З імем Віктара Ціханавіча Гарбатоўскага – хормайстра і кампазітара – звязана цэлая эпоха ў гісторыі народнай творчасці Віцебшчыны. Пры яго творчым удзеле і кіраўніцтве многія харавыя калектывы віцебскага краю дасягнулі значных поспехаў. Сярод іх можна назваць народны хор калгаса імя Раманава, хор таварыства сляпых г. Віцебска, хор саўгаса імя Углоўскага, хор Дома культуры полацкага аб’яднання “Шкловалакно” і інш. Аднак большую частку сваёй творчай дзейнасці майстар аддаў працы з народным хорам Віцебскай панчошна-трыкатажнай фабрыкі імя КІМ.

Нарадзіўся будучы музыкант 5 красавіка 1936 г. у в. Тушавая Горацкага раёна. На яго жыццё прыпала шмат нягод і няшчасцяў: падчас Вялікай Айчыннай вайны згубіў сям'ю, малым трапіў у нямецкі канцлагер, выжыў, выхоўваўся ў дзіцячым доме ў Віцебску. Яшчэ ў дзяцінстве самастойна навучыўся іграць на акардэоне, баяне і гармоніку, сам зрабіў сабе балалайку, захапляўся маляваннем. У 1954 г. Віктар паступіў у Віцебскае музычнае вучылішча на харавое аддзяленне. У час вучобы любіў слухаць песні ў выкананні прафесійных хароў, глыбока вывучаў іх гучанне, працу з гукам і інтанацыяй. Усё гэта дало пачынаючаму хормайстру магчымасць зрабіць працу з хорам сэнсам свайго жыцця, любімай справай і прафесіяй.

Пасля заканчэння вучобы ў 1959 г. В. Ц. Гарбатоўскі прыступіў да кіраўніцтва народным хорам фабрыкі імя КІМ, якому аддаў 36 гадоў свайго жыцця. За перыяд іх сумеснай працы калектыў дасягнуў значнага выканальніцкага майстэрства і неаднаразова выходзіў пераможцам розных аглядаў-конкурсаў мастацкай самадзейнасці і фестываляў. Адначасова з працай у хоры фабрыкі КІМ музыкант узначальваў народны хор Дома культуры ў п. Ула Бешанковіцкага раёна, арганізаваў і кіраваў народным хорам ''Дзвіна'' пры Доме культуры вытворчага аб’яднання ''Даламіт'', вёў курсы для кіраўнікоў мастацкай самадзейнасці пры абласным Доме народнай творчасці, падрыхтаваў 6 харавых калектываў да прысваення ім звання ''народны''.

Віктар Ціханавіч з’яўляецца таксама аўтарам больш чым 60 песень шырока вядомых на Беларусі ў асноўным патрыятычнай і грамадскай накіраванасці: ''Дума пра Леніна'', ''Прыдзвінскі край'', ''Шляхі завуць'', ''Бурай народжаныя'', ''Партыі'', ''Прывітальная'' і інш. Увесь яго творчы шлях – своеасаблівы летапіс беларускай народнай культуры.

За сваю карпатлівую і плённую творчую працу В. Ц. Гарбатоўскі неаднойчы адзначаўся ганаровымі граматамі і дыпломамі, быў узнагароджаны ордэнам ''Знак Пашаны'', а ў 1968 г. яму было прысвоена ганаровае званне ''Заслужаны дзеяч культуры Беларусі''.

Матэрыял падрыхтаваны ў 2012 г.