Нарадзіўся І. Ф. Сініцкі ў звычайнай сялянскай сям’і. У маладыя гады працаваў на Украіне. У 1893 г. пакінуў службу і вярнуўся на радзіму, дзе купіў кавалак зямлі і развёў на ім сад. У Смаргоні актыўна займаўся грамадскай дзейнасцю, пісаў нататкі ў газеты, абараняў сялян і рабочых у судах, даваў ім парады, пазычаў кнігі і часопісы са сваёй бібліятэкі. З-за сваёй дзейнасці меў рэпутацыю «натхніцеля рабочых у барацьбе з гаспадарамі». У доме Сініцкага збіралася моладзь, чытала і абмяркоўвала нелегальную літаратуру з бібліятэкі гаспадара.

Недзе паміж 1901 і 1904 гг. І. Ф. Сініцкі падарожнічаў за мяжой. Наведаў Англію, Францыю, Новую Зеландыю, Аўстралію, Цэйлон і іншыя мясціны. У Новай Зеландыі шмат вандраваў, назіраў за жыццём і працай рабочых, пазнаёміўся з мясцовым насельніцтвам маоры, наведваў прыродныя помнікі. Вынікам яго падарожжа стала кніга «Новая Зеландыя–Еўропа», у якой упершыню на рускай мове была апісана Новая Зеландыя. Кніга так і не пабачыла свет з-за цэнзурнай забароны, а карэктурны адбітак яе захоўваецца зараз у Гродзенскім дзяржаўным гісторыка-археалагічным музеі.

Іван Францавіч прымаў актыўны ўдзел у рэвалюцыйных падзеях 1905–1907 гг., восенню 1905 г. быў арыштаваны і пасаджаны ў Віленскую губернскую турму. Па прыгавору суда яго накіравалі ў ссылку ў Валагодскую губерню (Расія). У турме і ссылцы па просьбе рускага пісьменніка М. А. Рубакіна напісаў успаміны «З майго жыцця ў вёсцы» (да 1907 г.), якія былі прысвечаныя рэвалюцыйным падзеям канца ХІХ – пачатку ХХ стст. на Смаргоншчыне. Мемуары І. Ф. Сініцкага маюць не толькі гістарычную, але і літаратурную каштоўнасць і захоўваюцца ў фондзе М. А. Рубакіна ў Расійскай дзяржаўнай бібліятэцы.

З ссылкі рэвалюцыянер уцёк у Фінляндыю. Вярнуўшыся на радзіму, пісаў нататкі для «Нашай нівы» аб смаргонскім жыцці, падтрымліваў сувязі з Таварыствам беларускай школы, быў членам мясцовага самакіравання. Пасля Першай сусветнай вайны зноў адбудаваў разбураную падчас ваенных дзеянняў хату і аднавіў сад. Памер І. Ф. Сініцкі ў 1939 г. ад сухотаў, набытых у турме і ссылцы.

Матэрыял падрыхтаваны ў 2016 г.