Імя архітэктара Расціслава Аляксеевіча Шылая неадрыўна звязана з горадабудаўніцтвам і архітэктурай Брэстчыны. Усе яго работы, па меркаванні спецыялістаў, вызначаюцца глыбокай індывідуальнасцю, творчым падыходам да вырашэння архітэктурна-мастацкіх задач, запамінальным архітэктурным абліччам, што сведчыць пра вялікі талент іх аўтара.

Нарадзіўся будучы архітэктар у в. Раўнаполле Пухавіцкага раёна Мінскай вобласці. Спецыяльную адукацыю атрымаў у Беларускім політэхнічным інстытуце. Пасля заканчэння вучобы, у 1960–1981 гг. працаваў у інстытуце “Брэстграмадзянпраект” архітэктарам, галоўным архітэктарам праектаў, кіраўніком архітэктурна-канструктарскай майстэрні, галоўным архітэктарам інстытута, з 1981 г. – начальнікам Брэсцкага абласнога ўпраўлення па будаўніцтве і архітэктуры, затым – начальнікам галоўнага ўпраўлення архітэктуры і горадабудаўніцтва Брэсцкага аблвыканкама, з 1996 г. – кіраўнік персанальнай творчай майстэрні.

Асноўныя работы ў Брэсце: жылыя дамы па вул. Набярэжнай (1961–1963), будынкі Брэсцкай абласной клінічнай бальніцы і тэлевізійна-студыйнага комплексу (1965), жылыя дамы па Партызанскім праспекце, магазін на вул. Леніна (1970-я гг.), комплекс жылых дамоў з прадпрыемствамі культурна-бытавога абслугоўвання ва Усходнім раёне па вул. Маскоўскай (1970-я гг.), будынкі музычнага вучылішча (1973), кінатэатра “Беларусь” (1977), былога Брэсцкага абкама КПБ (1977), фізкультурна-аздараўленчага комплексу (1984), Брэсцкага аэравакзальнага комплексу (1988, у суаўтарстве), адзначанага у гэтым жа годзе Дзяржаўнай прэміяй БССР.

У 2000–2001 гг. прымаў удзел у рэканструкцыі гандлёвага цэнтра “Славянскі базар”, вытворчага прадпрыемства пад гандлёвыя рады на вул. Куйбышава (2001). У суаўтарстве з украінскім скульптарам У. Галаўко стварыў бюст Т. Р. Шаўчэнкі, устаноўлены ў Брэсце на бульвары Шаўчэнкі (2002). Удзельнічаў у праектаванні Свята-Георгіеўскага храма ў в. Вычулкі Брэсцкага раёна (2003).

Уклад Р. Шылая ў развіццё архітэктуры і горадабудаўніцтва Брэстчыны быў высока адзначаны ўрадавымі і спецыяльнымі ўзнагародамі. За заслугі ў галіне горадабудаўніцтва і архітэктуры ў 1985 г. яму прысвоена званне “Заслужаны архітэктар Беларусі”, пазней – акадэміка Беларускай акадэміі архітэктуры.

Матэрыял падрыхтаваны ў 2011 г.