Краткая справка:
мастак, які працаваў у галіне комплекснага мастацкага праектавання і афармлення інтэр'ераў, музейных экспазіцый, станковага жывапісу, графікі і плаката
Имена на других языках:
Kankou Mikhail Karnilavitch (не определен); Коньков Михаил Корнилович (русский);
3145 символов
Справка
Брэсцкая зямля мае даўнія традыцыі, багатую і шматвобразную гісторыю ў галіне выяўленчага мастацтва. Яе прадстаўнікі займаюць адметнае месца ў беларускай культуры. Да іх ліку адносіцца і Міхаіл Карнілавіч Канькоў – цікавы, шчыры, разнастайны мастак. Нарадзіўся ён у в. Пачашава Глазаўскага раёна (Удмурцкая Рэспубліка, Расія). У 1966 г. скончыў Кунгурскае гарадское прафесійна-мастацкае вучылішча (Пермская вобласць, Расія) і атрымаў спецыяльнасць разьбяра па мастацкай апрацоўцы каменя. Служыў у арміі ў Брэсце, дзе застаўся пасля дэмабілізацыі.
М.К. Канькоў працуе ў галіне комплекснага мастацкага праектавання і афармлення ітэр’ераў, музейных экспазіцый, манументальна-дэкаратыўнага роспісу, станковага жывапісу, графікі і плаката. З 1962 па 1972 гг. быў метадыстам па выяўленчым мастацтве ў Брэсцкім абласным Доме народнай творчасці, потым мастаком-афарміцелем на прадпрыемствах горада. З 1991 г. галоўным мастаком Брэсцкага камбіната “Мастацтва”, дзе доўгі час працаваў з Б. Малахавым, які меў архітэктурную адукацыю. Вынікам сумеснай дзейнасці стала афармленне ў Брэсце музея Выратаваных мастацкiх каштоўнасцяў, Дома грамадзянскіх абрадаў, музея “Хлеб” у калгасе “Савецкая Беларусь” Брэсцкай вобласці. Вітражы і інтэр’еры М. Канькова ўпрыгожваюць таксама многія школы, бальніцы, паліклінікі, палацы культуры, дзіцячыя садкі горада. Але гэта толькі адзін бок творчасці мастака, другі – яго жывапісныя творы.
У 1994 г. М. Канькоў стаў членам Беларускага Саюза мастакоў, і з гэтага года ён кіраўнік творчай майстэрні “АРТ-М”. З 1995 па 2004 гг. быў старшынёй праўлення Брэсцкай абласной арганізацыі Беларускага Саюза мастакоў. Міхаіл Карнілавіч удзельнік мастацкіх выставак з 1970 г. Праводзіў персанальныя выстаўкі ў Брэсце (2000) і ў Германіі (1999, 2001, 2002). Працы мастака знаходзяцца ў Брэсцкім краязнаўчым музеі, у прыватных калекцыях. Узнагароджаны медалём Беларускага Саюза мастакоў “За заслугі ў выяўленчым мастацтве” (1998).
На рахунку М.К. Канькова шмат твораў, якія пакінулі адметны след у беларускім выяўленчым мастацтве: “Спынены палёт”, “Блакітны шар”, “З-пад цёмнай вады...”, “Правінцыяльны горад” і інш.; трыпціхі “Час разбураных гнёздаў”, “Гісторыя хваробы”; серыі “Чарнобыльская восень”, “У пошуках страчанага часу”, “Настальгія” і інш. Ён – мастак міфаў, ілюзій і асацыяцый. У фантасмагарычным калейдаскопе колераў фарбаў, у скрыжаванні і паралелях ліній адлюстроўваюцца шматгранныя пачуцці аўтара, яго адносіны да сучаснасці, гісторыі, чалавека. У кожнай карціне заўсёды ёсць дэталь, якая дапамагае раскрыць галоўную ідэю і сэнс твора. Гэта асабліва праяўляецца ў такіх палотнах, як “Радасць”, “Сон у летнюю ноч”, “Слёзы капалі”, “Прысвячэнне крэпасці”, “Мой горад” і інш. З дапамогай мастацтва М. Канькоў прабіваецца да сэрцаў людзей, прымушае прыняць удзел у нетаропкай размове-роздуме. У апошнія гады выразна праявіўся яшчэ адзін адметны бок творчасці мастака – стварэнне ікон з выявамі святых і анёлаў. Тут найбольш значнымі з’яўляюцца работы з серыі “Дакрананне да Дыянісія”.
Матэрыял падрыхтаваны ў 2012 г. Брэсцкай цэнтральнай гарадской бібліятэкай імя А.С. Пушкіна.