Нарадзіўся ў в. Ліпна Камянецкага раёна Брэсцкай вобласці ў сялянскай сям`і. Вучыўся ў Мікалаеўскай пачатковай, потым у Камянецкай сярэдняй школах. Пасля заканчэння Ленінградскага мастацка-графічнага педагагічнага вучылішча ў 1954 г. выкладаў маляванне ў Ерцаўскай сярэдняй школе Архангельскай вобласці (Расія), з 1955 г. – мастак мастацкай майстэрні ў г. Камянцы. Праз два гады пераехаў у Брэст, дзе працаваў у афiцэрскiм клубе, кiнатэатры “Беларусь”, мастацка-вытворчай майстэрні, мастацкiм камбiнаце “Мастацтва”, шмат маляваў. З 1957 г. В. Сабалеўскі ўдзельнічаў у абласных і рэспубліканскіх мастацкіх выстаўках, міжнародных жывапісных пленэрах. У 1964 г. стаў членам Беларускага саюза мастакоў і старшынёй Брэсцкай абласной арганізацыі Саюза мастакоў БССР. Гэту пасаду займаў да 1995 г.

Работы Васіля Мікалаевіча выкананы алеем, пастэллю, акварэллю, у тэхніцы маркетры (iнкрустацыя па дрэве). У станковым жывапісе ён працаваў у жанрах пейзажа і нацюрморта. Асноўныя творы мастака – карціны «Зямля» (1960), «Аэрадром у гарах» (1964), «Бэзавая квецень» (1969), «Восень. Возера Меднае» (1977), «Апошняе лісце» (1982), «Ветраны дзень», «Восень» (абедзве 1984), «Апошні снег» (1985) і інш. У 1989–1993 гг. напісаў шмат пейзажаў у Польшчы, Венгрыі, Германіі. Творам В. Сабалеўскага ўласцівы ўраўнаважанасць кампазіцыі, трактоўка формы шырокімі мазкамі, эмацыянальнасць у перадачы колеравага багацця прыроды. Сельскiя ваколiцы, рачулкi, храмы, пералескi i палi роднага краю атрымлiвалi пад яго пэндзлем непаўторна добры каларыт, пагружалi гледача ў цiшыню шматмернага свету. Працягваючы традыцыi рускiх жывапiсцаў (А. Саўрасава, А. Куiнджы, І. Грабара), В. Сабалеўскi тонка i дакладна ствараў пейзажы настрою. У нацюрмортах мастака кветкi дыхаюць iснасцю прыроды, ранiшняй свежасцю. Яго творы знаходзяцца ў Нацыянальным мастацкім музеі Рэспублікі Беларусь, Брэсцкім абласным краязнаўчым музеі, у мастацкіх галерэях і прыватных калекцыях Беларусі, Польшчы, Германіі, Венгрыі і іншых краiн.

Матэрыял падрыхтаваны ў 2012 г. Камянецкай цэнтральнай раённай бібліятэкай імя У.М. Ігнатоўскага.