Сокалаў-Кубай Генадзь Генадзьевіч нарадзіўся ў Мінску. Скончыў Мінскае мастацкае вучылішча (1961), Беларускі дзяржаўны тэатральна-мастацкі інстытут (1969). З 1980 г. працаваў у Рэспубліканскім навукова-метадычным цэнтры народнай творчасці і культурна-асветнай работы, Мінскім інстытуце культуры (зараз Беларускі дзяржаўны ўніверсітэт культуры і мастацтваў). З 1989 г. выкладаў у Беларускай акадэміі мастацтваў. У 1981–1986 гг. праводзіў семінары народных разьбяроў па дрэве ў Гродне, Навагрудку, Мінску, на якіх ствараліся мемарыяльныя кампазіцыі на фальклорныя і літаратурныя сюжэты, арганізоўваў фальклорна-этнаграфічныя святы ў Кобрыне і іншых гарадах. Унёс значны ўклад у развіццё мастацтва выцінанкі. У 1988 г. стаў членам Беларускага саюза мастакоў.

Працаваў Г.Г. Сокалаў-Кубай у галіне мастацкай крытыкі, гісторыі мастацтва. З’яўляецца аўтарам шэрага артыкулаў, прысвечаных партрэтнаму жывапісу («Партрэтны жывапіс Беларусі XIV–XVI ст.», «Партрэт Кшыштафа Весялоўскага», «Партрэт Еўфразіны Тышкевіч»), сувязі сучаснага мастацтва з народнымі традыцыямі. Ён стварыў творчыя партрэты М. Селешчука, М. Купавы.

Матэрыял падрыхтаваны ў 2022 г.