Сяргей Ільіч Аўсіевіч нарадзіўся ў вёсцы Ягадка Бярэзінскага раёна Барысаўскай акругі Беларускай ССР (цяпер Бярэзінскі раён Мінскай вобласці).

У 1951 г. стаў працаваць на Мінскім падшыпнікавым заводзе. З 1956 г. быў наладчыкам мнагашпіндальных аўтаматаў і паўаўтаматаў. Дасканалае авалоданне прафесіяй дапамагло яму ў распрацоўцы рацыянальнага кальцавога маршрута, які скараціў колькасць пераходаў ад станка да станка і спрыяў значнаму павышэнню прадукцыйнасці працы.

З 1962 г. С.І. Аўсіевіч працаваў токарам-аператарам такарных аўтаматаў, пры гэтым абслугоўваў тры станкі замест двух па норме, што дазволіла павялічыць колькасць выпускаемай прадукцыі амаль у два разы. Асабістую дзявятую пяцігодку ён завяршыў у чэрвені 1974 г.

Сяргей Ільіч штодня думаў аб удасканаленні працэсу вытворчасці. Шэраг яго рацыяналізатарскіх прапаноў дазволіў прадпрыемству значна павялічыць выпуск прадукцыі і палепшыць яе якасць. У 1973 г. С.І. Аўсіевічу было прысвоена ганаровае званне «Заслужаны работнік прамысловасці Беларускай ССР».

Указам Прэзідыума Вярхоўнага Савета СССР ад 3 студзеня 1974 г. за выдатныя поспехі ў выкананні і перавыкананні планаў 1973 г. і прынятых сацыялістычных абавязацельстваў Сяргею Ільічу Аўсіевічу было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Сяргей Ільіч працаваў на заводзе да выхаду на заслужаны адпачынак у 1987 г. Узнагароджаны двума ордэнамі Леніна (1966; 1974), медалямі, мае званне заслужанага работніка прамысловасці Беларусі.

Пераклад 2021 г. матэрыялаў Міжнароднага інтэрнэт-праекта «Герои страны».