Міхаіл Міхайлавіч Гармоза нарадзіўся ў сялянскай сям’і вёскі Чапля Дзяржынскага раёна Мінскай вобласці. Пасля заканчэння 4-х класаў школы працаваў трактарыстам Дзяржынскай МТС.

У 1938 г. стаў чырванафлотцам, служыў наводчыкам гарматы 152-міліметровай гаўбічнай батарэі Балтыйскага флоту.

У час савецка-фінляндскай вайны 1939–1940 гг. прымаў удзел у штурме “Лініі Манергейма” на Карэльскім перашыйку. На гэтым рубяжы знаходзіліся тры лініі абароны, якія складаліся з умацаваных вузлоў, аснашчаных вялікай колькасцю жалезабетонных ДОТаў (доўгачасовых агнявых кропак) з кулямётамі, сеткай закрытых агнявых кропак, сістэмай траншэй і супрацьтанкавых загарод.

Штурм Карэльскага перашыйка адбываўся ў лютым 1940 г. Для разбурэння сістэмы абароны і вывядзення са строю фінскіх умацаванняў чырванафлотцы рашылі выкарыстаць гаўбіцу калібрам 203 мм. Агнявы пункт абсталёўвалі пад непрыяцельскім абстрэлам, у глыбокім снезе і марозным грунце. Гармату размясцілі на адлегласці 400 м ад лініі фронту. Раніцай 8 лютага 1940 г. балтыйцы адкрылі агонь па ДОТу праціўніка. Дзякуючы трапнай стральбе наводчыка Гармозы фінскае ўмацаванне было разбурана, а яго гарнізон знішчаны.

Указам Прэзідыума Вярхоўнага Савета СССР ад 21 красавiка 1940 г. Міхаілу Міхайлавічу Гармозе было прысвоена званне Героя Савецкага Саюза з уручэннем ордэна Леніна і медаля “Залатая Зорка”.

У 1941 г. М.М. Гармоза скончыў Кіеўскае танкавае вучылішча імя С.К. Цімашэнкі, стаў механікам-вадзіцелем танка 2-га класа і трапіў на фронт. Служыў у Далёкаўсходняй танкавай дывізіі, ваяваў на Волхаўскім, 1-м Украінскім і 1-м Беларускім франтах. Прайшоў шлях ад камандзіра танка да камандзіра танкавай роты 11-га асобнага гвардзейскага цяжкага танкавага палка.

У красавіку 1944 г. танкавы полк, у складзе якога ваявала рота М.М. Гармозы, прымаў удзел у абароне украінскага Івана-Франкоўска. За два дні баёў нашымі танкістамі было падбіта каля 30 нямецкіх “Тыграў” і “Пантэр”, а іх камандзір быў узнагароджаны ордэнам Чырвонай Зоркі.

У сакавіку 1945 г. у г. Лабенц рота М.М. Гармозы на працягу 1,5 сутак стрымлівала атакі нямецкай пяхоты з артылерыяй і танкамі. Пад кіраўніцтвам гвардыі капітана Гармозы чырвонаармейцы знішчылі 6 танкаў і самаходных установак, 3 гарматы, 5 мінамётаў і да 400 салдат і афіцэраў праціўніка. За гэты подзвіг капітан Гармоза быў узнагароджаны ордэнам Айчыннай вайны ІІ ступені.

Танкісты М.М. Гармозы вызвалялі Беларусь, Польшчу і Германію, фарсіравалі Одэр і Віслу, штурмавалі Берлін.

Пасля заканчэння вайны М.М. Гармоза працягваў службу ў ваенна-марскім флоце. У 1946 г. скончыў Ленінградскую вышэйшую афіцэрскую бранятанкавую школу, служыў у берагавых часцях. У 1948 г. выйшаў у запас і вярнуўся ў Беларусь.

Жыў і працаваў у Мінску. Узнагароджаны ордэнамі Леніна, Чырвонай Зоркі, Айчыннай вайны І-й і ІІ-й ступеняў, медалямі.

У горадзе Дзяржынск Мінскай вобласці імем Героя названа вуліца, на Алеі Герояў усталяваны мемарыяльны знак.

Матэрыял падрыхтаваны ў 2024 г.