Малаш Леаніла Апанасаўна

Дата рождения: 01.06.1927 Несцераўка, в., Докшыцкі раён, Віцебская вобласць

Дата смерти: 05.05.2012

Краткая справка: фалькларыстка, лаўрэат Дзяржаўнай прэміі Беларусі (1986)

Варианты имени: Малаш Леаніла Апанасаўна

Имена на других языках: Малаш Леонила Афанасьевна (русский);

Нарадзілася Леаніла Апанасаўна Малаш у в. Несцераўка Докшыцкага раёна Віцебскай вобласці. У 1952 г. скончыла Беларускі дзяржаўны ўніверсітэт імя У. І. Леніна. Адразу пасля вучобы працавала ў Інстытуце літаратуры АН БССР, у 1955–1960 гг. у Беларускім дзяржаўным універсітэце імя У. І. Леніна, з 1964 г. у Цэнтральнай навуковай бібліятэцы АН БССР, у 1968–1990 гг. у Інстытуце мастацтвазнаўства, этнаграфіі і фальклору АН БССР. У 1967 г. стала кандыдатам філалагічных навук. Даследавала беларускі і славянскі фальклор, гісторыю беларускай фалькларыстыкі, беларускае вяселле ў агульнаславянскім кантэксце. Прымала ўдзел у VII, IХ, ХI, ХII Міжнародных з'ездах славістаў. Яна лаўрэат Дзяржаўнай прэміі Беларусі (1986).

Леаніла Малаш з'яўляецца аўтарам кнігі «Беларуска-польская фальклорная інтэрферэнцыя ў кантэксце культурных кантактаў» (1998); артыкулаў «Даленга-Хадакоўскі (Адам Чарноцкі) і яго спадчына» (1967), «У пошуках фальклорных зборнікаў Даленгі-Хадакоўскага» (1970), «Пачынальнік беларускай фалькларыстыкі : да 190-годдзя з дня нараджэння Яна Чачота» (1986). Фальклорныя запісы Л. Малаш папоўнілі тамы з серыі «Беларуская народная творчасць»: «Радзінная паэзія» (1971), «Дзіцячы фальклор» (1972), «Жартоўныя песні» і «Жніўныя песні» (1974), «Веснавыя песні» і «Выслоўі» (1979), « Купальскія і пятроўскія песні» (1985), «Прыпеўкі» (1989), «Замовы» і «Паэзія беларускага земляробчага календара» (1992), «Жаніцьба Цярэшкі» (1993). Яна з'яўляецца адным з аўтараў прац «Беларуская фалькларыстыка: эпоха феадалізму» (1989, з Г. Каханоўскім і К. Цвіркам), «З душою славяніна: жыццё і дзейнасць З. Я. Даленгі-Хадакоўскага» (1991, з А. Аксамітавым), «Беларуская этнаграфія і фальклор у працах славянскіх вучоных эпохі рамантызму» (1973, з В. Бандарчыкам), «Беларускае вяселле ў яго адносінах да заходнеславянскіх вяселляў – польскага і славацкага» (1993, з А. Аксамітавым). Леаніла Малаш – укладальнік кніг «Вяселле: песні» (кн. 1–6, 1980–1988) з серыі «Беларуская народная творчасць», «Украінскія народныя песні ў запісах Зарыяна Даленгі-Хадакоўскага» (1974, з А. Дэем), «Выбранае. Зарыян Даленга-Хадакоўскі» (2007).

Матэрыял падрыхтаваны ў 2017 г.