Прафесар, доктар медыцынскіх навук Уладзімір Дзмітрыевіч Мяланьін нарадзіўся ў Варонежскай вобласці (Расія). У 1961 г. скончыў лячэбны факультэт Варонежскага медыцынскага інстытута (цяпер Варонежская дзяржаўная медыцынская акадэмія імя М.Н. Бурдэнкі), працаваў у лячэбных установах Варонежскай і Маскоўскай абласцей (1961–1965). У 1972 г. У.Д. Мяланьін абараніў кандыдацкую, у 1979 г. – доктарскую дысертацыю. Дысертацыйныя працы навукоўца былі прысвечаны праблемам трансплантацыі і пластыкі касцявой і храшчавой тканак ЛОР-органаў. Да 1978 г. У.Д. Мяланьін працаваў у ЛОР-клініцы Першага Маскоўскага медыцынскага інстытута (цяпер Першы Маскоўскі дзяржаўны медыцынскі ўніверсітэт імя І.М. Сечанава) спачатку ўрачом-ардынатарам, потым – загадчыкам аддзялення. У 1978–1986 гг. узначальваў кафедру ЛОР-хвароб Новасібірскага медыцынскага інстытута (цяпер Новасібірскі дзяржаўны медыцынскі ўніверсітэт).

У 1986 г. У.Д. Мяланьін прыехаў на Беларусь і на працягу 13 гадоў узначальваў кафедру отарыналарынгалогіі з курсам стаматалогіі Гродзенскага медыцынскага інстытута (цяпер Гродзенскі дзяржаўны медыцынскі ўніверсітэт). У гэты перыяд ім былі распрацаваны і ўведзены ў практыку эфектыўныя метады хірургічных умяшанняў пры траўматычных пашкоджаннях ЛОР-органаў, дабраякасных пухлінах лобных пазух, дэфармацыі носа, тугавухасці. Вялікую ўвагу доктар Мяланьін надзяляў лячэнню анкалагічных хворых і захворванняў лімфаглотачнага кальца. Ім распрацаваны больш за 17 аперацый і новых спосабаў лячэння, якія ўкараніліся ў практычную дзейнасць яго вучнямі і паслядоўнікамі.

Дзякуючы намаганням У.Д. Мяланьіна было створана аддзяленне на 60 ложкаў у 2-й гарадской бальніцы г. Гродна і абласны кансультацыйны цэнтр па отарыналарынгалогіі пры Гродзенскай абласной бальніцы, арганізавана клініка хвароб вуха, горла, носа і сківіца-тварнай хірургіі, значна пашыраны дыяпазон навуковых даследаванняў.

За гады навуковай дзейнасці У.Д. Мяланьін апублікаваў больш за 140 навуковых прац, манаграфію, атрымаў 2 патэнты на вынаходніцтвы і 38 рацыяналізатарскіх прапаноў. Пад яго кіраўніцтвам абаронены 2 доктарскія і 6 кандыдацкіх дысертацый. У 1984 г. вучоны быў узнагароджаны сярэбраным медалём ВДНГ. Званне прафесара атрымаў у 1996 г. і быў абраны членам-карэспандэнтам Міжнароднай Акадэміі отарыналарынгалогіі хірургіі галавы і шыі. Матэрыялы сваіх навуковых даследаванняў ён прадстаўляў на міжнародных кангрэсах і сімпозіумах ў Чыкага, Кракаве, Сафіі, Празе, Будапешце. У 1999 г. ён скончыў навуковую дзейнасць на кафедры медыцынскага ўніверсітэта ў Гродна і пераехаў у Маскву, дзе ў маі 2000 г. узначаліў ЛОР-аддзяленне бальніцы № 83 Федэральнага медыка-біялагічнага агенцтва (ФМБА) Расіі, з’яўляўся кіраўніком аддзялення захворванняў вуха ФДУ НКЦ (Федэральная дзяржаўная ўстанова “Навукова-клінічны цэнтр отарыналарынгалогіі”). Прафесар Мяланьін арганізаваў кафедру отарыналарынгалогіі Інстытута павышэння кваліфікацыі ФМБА Расіі, а са студзеня 2006 г. займае пасаду галоўнага навуковага супрацоўніка аддзела захворванняў вуха ФДУ НКЦ, кіруе клінічнай базай, размешчанай на тэрыторыі ЛОР-аддзялення 86-й клінічнай бальніцы ФМБА Расіі.

Вучоны прымаў таксама актыўны ўдзел у грамадскай дзейнасці: выбіраўся старшынёй Новасібірскага і Гродзенскага абласных грамадстваў урачоў, з’яўляўся членам праўлення Рэспубліканскага грамадства отарыналарынголагаў Рэспублікі Беларусь, уваходзіў у склад рэдакцыйных саветаў медыцынскіх часопісаў па сваёй спецыяльнасці.

Матэрыял падрыхтаваны ў 2012 г.