Пасля заканчэння ў 1960 г. Беларускага політэхнічнага інстытута Н.М. Нядзелька пачала працу ў Беларускім навукова-даследчым праектным інстытуце па будаўніцтве на сяле “БелНДІдзіпрасельбуд” (цяпер Навукова-даследчае праектране РУП “Дзіпрасельбуд”), з 1969 г. Нона Міхайлаўна займала пасаду галоўнага архітэктара праектаў. У 1963 г. увайшла ў Саюз архітэктараў СССР.

Н.М. Нядзелька ўнесла значны ўклад у развіццё архітэктурнай справы на Беларусі як аўтар тыпавых праектаў жылых і грамадскіх будынкаў для сельскіх населеных пунктаў. Сярод найбольш вядомых работ архітэктара – праект планіроўкі і забудовы аг. Малеч Бярозаўскага раёна: кантора саўгаса, цэнтральная плошча і блок 16-кватэрных жылых дамоў з памяшканнямі гандлёвага прызначэння (прэмія Савета Міністраў СССР, 1981); адміністрацыйны будынак і бульвар у аг. Аснежыцы Пінскага раёна; грамадскія цэнтры ў аг. Казловічы Слуцкага раёна і аг. Морач Клецкага раёна; Дамы культуры, адміністрацыйныя будынкі, жылыя мансардныя дамы ў аг. Абухава Гродзенскага раёна і ў аг. Аўсянка Горацкага раёна. Нона Міхайлаўна ў суаўтарстве распрацавала комплекс вучэбнага цэнтра Нацыянальнага банка Беларусі ў в. Раўбічы Мінскага раёна.

Творчая дзейнасць Н.М. Нядзелька адзначана чатырма сярэбранымі, адной залатой і бронзавай медалямі, медалямі ВДНГ СССР на Усесаюзных аглядах-конкурсах на лепшы сельскі пасёлак. У 1991 г. ёй прысвоена ганаровае званне “Заслужаны архітэктар Беларусі”.

Матэрыял падрыхтаваны ў 2012 г.