Беларускі прафесар, доктар эканамічных навук, географ Мікалай Тарасавіч Раманоўскі нарадзіўся ў сялянскай сям’і ва ўрочышчы Мядзвежына непадалёк ад Мінска. Працоўны шлях пачаў у 1930-я гг. у рабочым калектыве цагельнага завода (цяпер Мінскі завод будаўнічых матэрыялаў), але ён заўсёды марыў аб вучобе і навуцы. У 1938 г. М. Раманоўскі выдатна скончыў факультэт народнагаспадарчага ўліку Беларускага інстытута народнай гаспадаркі (цяпер Беларускі дзяржаўны эканамічны ўніверсітэт) і быў рэкамендаваны для навучання ў аспірантуры пры БДУ імя У.І. Леніна. У 1941 г. пачаў праводзіць першыя заняткі са студэнтамі: чытаў лекцыі па эканамічнай геаграфіі Беларусі і замежных краін, геаграфіі сусветнай гаспадаркі. Педагагічная дзейнасць была спынена Вялікай Айчыннай вайной, у час якой Мікалай Тарасавіч актыўна ўдзельнічаў у партызанскім руху.

Пасля заканчэння вайны вучоны вярнуўся да выкладчыцкай і навуковай дзейнасці: узначаліў тэхнікум па падрыхтоўцы кадраў статыстычнай службы ў Мінску, працаваў над дысертацыяй. З 1946 г. М.Т. Раманоўскі працаваў на кафедры эканамічнай геаграфіі БДУ, пасля з’яўляўся дэканам геаграфічнага факультэта, які ўзначальваў на працягу трыццаці гадоў (1947–1955 і 1962–1983 гг.). М.Т. Раманоўскі спрыяў арганізацыі на факультэце новых кафедр і навукова-даследчых лабараторый, стварэнню аддзялення турызму і краязнаўства, будаўніцтву геаграфічнай станцыі, усталяванню цесных сувязяў са шматлікімі акадэмічнымі і галіновымі інстытутамі, планава-эканамічнымі і праектнымі ўстановамі.

У 1966 г. выйшла з друку манаграфія М.Т. Раманоўскага «Развитие мануфактурной промышленности в Белоруссии (вторая половина XVII – первая половина XIX вв.)», па якой ён у 1970 г. абараніў доктарскую дысертацыю і атрымаў званне прафесара.

За гады працы ва ўніверсітэце М.Т. Раманоўскім створана беларуская школа эканомгеографаў, напісаны шэраг падручнікаў для студэнтаў ВНУ і дапаможнікаў па эканамічнай геаграфіі Беларусі, апублікавана каля ста навуковых прац у беларускіх і замежных выданнях. М.Т. Раманоўскі – адзін з нязменных рэдактараў і аўтараў Беларускай энцыклапедыі, суаўтар Атласа БССР і шматлікіх навуковых зборнікаў. Вучоны цікавіўся пытаннямі гісторыі развіцця народнай гаспадаркі і эканамічнай геаграфіі Беларусі: суаднёс праблемы тэрытарыяльнай арганізацыі гаспадаркі краіны з прыроднымі і працоўнымі рэсурсамі, абгрунтаваў галоўныя напрамкі даследаванняў у галіне геаграфіі прамысловасці, сельскай гаспадаркі, распрацаваў асноўныя шляхі інтэграцыі народнагаспадарчага комплексу Беларусі ў сусветную гаспадарку. Вучоным падрыхтавана 15 кандыдатаў навук, яго вучні працуюць выкладчыкамі-географамі школ і вышэйшых навучальных устаноў.

Навукова-педагагічную дзейнасць прафесар М.Т. Раманоўскі паспяхова сумяшчаў з актыўнай грамадскай пазіцыяй: з’яўляўся старшынёй спецыялізаванага Вучонага савета па абароне кандыдацкіх дысертацый у галіне геаграфічных навук пры БДУ, актыўна працаваў у складзе Беларускага таварыства “Веды”. Мікалай Тарасавіч уваходзіў у склад вядучых спецыялістаў па эканамічных навуках НАН Беларусі, яму неаднаразова даводзілася прымаць удзел у працы міжнародных канферэнцый і сімпозіумаў, весці работу ў Савецкім камітэце салідарнасці краін Азіі і Афрыкі. Прафесар Раманоўскі валодаў выдатнымі арганізатарскімі і кіраўнічымі здольнасцямі. Яго высокая культура, інтэлігентнасць, прастата і добразычлівасць выклікалі да яго глыбокую павагу калег і студэнтаў. Шматгадовая праца і баявыя заслугі прафесара М.Т. Раманоўскага адзначаны ордэнамі Айчыннай вайны ІI ступені, Чырвонай Зоркі, Дружбы народаў, шматлікімі медалямі і граматамі. У 1973 г. яму было прысвоена ганаровае званне “Заслужаны работнік вышэйшай школы БССР”.

Матэрыял падрыхтаваны ў 2012 г.