Уладзімір Сяргеевіч Салдатаў набыў заслужаны аўтарытэт дзякуючы высокаму прафесіяналізму, таленту педагога і даследчыка. Навуковая дзейнасць вядомага фізікахіміка неаднаразова атрымлівала высокую ацэнку ў Беларусі і за мяжой. Вынікі яго навуковых распрацовак шырока прымяняюцца як у розных галінах прамысловасці, так і ў развіцці хімічнай навукі краіны.

Нарадзіўся будучы вучоны 19 мая 1937 г. у г. Смаленск (Расія) у сям'і служачага. Пасля заканчэння ў 1959 г. хімічнага факультэта Беларускага дзяржаўнага ўніверсітэта (БДУ) працаваў старшым лабарантам Інстытута агульнай і неарганічнай хіміі (ІАНХ) АН БССР. З 1959 па 1962 г. быў аспірантам БДУ, абараніў кандыдацкую дысертацыю, прысвечаную тэорыі іонаабменных працэсаў. З 1962 па 1981 г. працаваў старшым навуковым супрацоўнікам і загадчыкам лабараторыі ІАНХ АН БССР. У 1969 г. абараніў доктарскую дысертацыю на тэму “Исследование в области теории ионообменных равновесий”, у аснову якой лягло апісанне асноўных заканамернасцей і асаблівасцей іонаабменных сістэм. Уладзімір Сяргеевіч стаў доктарам хімічных навук у 1970 г., званне прафесара атрымаў у 1972 г., з 1984 г. – акадэмік НАН Беларусі (член-карэспандэнт з 1977 г.). З 1981 па 2004 г. узначальваў Інстытут фізіка-арганічнай хіміі НАН Беларусі (з 2004 г. – загадчык аддзела), адначасова ў 1988–1992 гг. з'яўляўся віцэ-прэзідэнтам НАН Беларусі.

Уладзімірам Сяргеевічам пройдзены вялікі і плённы навуковы шлях. Тэматыка яго навуковых даследаванняў надзвычай багатая і разнастайная. Яму належаць шматлікія навуковыя працы па тэорыі іоннага абмену і тэрмадынаміцы іонаабменных раўнаваг, даследаванні іонаабменных працэсаў у многакампанентных сістэмах. Вучоны зрабіў вялікі ўклад у вывучэнне тэрмадынамікі абмену неарганічных катыёнаў і аніёнаў на палімерных іанітах розных тыпаў і ўстанавіў асноўныя заканамернасці гэтых працэсаў, а таксама знайшоў шэраг новых з'яў, якія шырока выкарыстоўваюцца ў навуковай літаратуры. Асноўныя заканамернасці і асаблівасці абагульнены ў манаграфіях “Простые ионообменные равновесия” (1972) і “Ионообменные равновесия в многокомпонентных системах” (1988; у суаўтарстве з В.А. Бычковай). За цыкл тэарэтычных работ па тэрмадынаміцы іонаабменных працэсаў вучоны быў удастоены прэміі Ленінскага камсамола (1971).

Навукоўцам былі распрацаваны агульныя прынцыпы, тэхналогія і рэгенерацыя іанітнай глебы – новы від хімічнай прадукцыі. Глебы знайшлі шырокае прымяненне ў спецыяльным раслінаводстве (на касмічных караблях, суднах далёкага плавання, ва ўмовах Арктыкі і г. д.). У цяперашні час іанітная глеба выкарыстоўваецца ў біятэхналогіях для адаптацыі і размнажэння розных відаў раслін, у тым ліку для чаранкавання мікракланальна аздароўленай бульбы. Уладзімір Сяргеевіч актыўна праводзіў даследаванні па ўдасканаленні і пошуку новых шляхоў выкарыстання іанітных глебаў. Асаблівую ўвагу ён надаў пытанням рэкультывацыі знясіленых глебаў з дапамогай іанітных, выкарыстанні іх у якасці ўгнаенняў. Вынікі даследаванняў па гэтым кірунку прадстаўлены ў манаграфіях “Ионитные почвы” (1978; разам з Н.Р. Пёрышкінай, Р.П. Харошка) і “Искусственные почвы для растений” (1985). За стварэнне іанітных глебаў У. С. Салдатаў разам з супрацоўнікамі ўдастоены Дзяржаўнай прэміі БССР (1980).

Адзін з кірункаў навуковых даследаванняў У.С. Салдатава – камп'ютарнае мадэліраванне фізіка-хімічных уласцівасцей іанітаў. Вучоным распрацавана новая методыка квантава-хімічнага мадэліравання складаных іонаабменных сістэм, прызначаная для мэтанакіраванага пошуку новых высокаэфектыўных іанітаў і сарбентаў без правядзення працяглых і працаёмкіх эксперыментальных даследаванняў. Прапанаваны і апрабаваны метад ацэнкі ўплыву прасторавай структуры палімерных сетак на ўласцівасці катыёнаў і аніёнаў. Распрацаваны методыкі экспрэснай ацэнкі абменнай ёмістасці і параметраў кіслотнасці іонаабменных матэрыялаў з выкарыстаннем камп'ютарнага мадэліравання. За цыкл работ, прысвечаных матэматычнаму мадэліраванню іонаабменных раўнаваг Уладзімір Сяргеевіч атрымаў прэмію НАН Беларусі (1993).

Значны ўклад унесены вучоным і яго супрацоўнікамі ў распрацоўку тэарэтычнай асновы атрымання палімерных мембран зададзенай структуры і спосабаў іх выкарыстання для ачысткі газаў і вадкасцей ад мікрачасцінак і бактэрый. На аснове распрацаванай элементнай базы створаны мембранныя працэсы асвятлення, стэрылізацыі і канцэнтрыравання раствораў біялагічна актыўных рэчываў, перапрацоўкі малочных прадуктаў, асвятлення пладова-ягадных сокаў і він, ачысткі сцёкавых вод. Сёння ўстаноўкі мембраннага раздзялення ўкаранёны ў прамысловых маштабах на большасці прадпрыемствах Беларусі і іншых краін. Пад яго кіраўніцтвам распрацавана арыгінальная (не мае замежных аналагаў) экстракцыйная тэхналогія выдзялення высокаачышчаных амінакіслот, што рэалізавана на Гродзенскім заводзе медыцынскіх прэпаратаў. Была вырашана важная задача стварэння лекавых прэпаратаў на аснове амінакіслот у рамках Дзяржаўнай праграмы “Лекавыя сродкі”, што дазволіла падняць адну з найважнейшых галін фармацэўтычнай прамысловасці Беларусі.

Для дзейнасці У.С. Салдатава характэрны шырокі дыяпазон навуковых інтарэсаў. На працягу доўгага перыяду вучоны з'яўляўся кіраўніком, каардынатарам, членам навуковых саветаў Дзяржаўных праграм навуковых даследаванняў розных узроўняў, старшынёй экспертнага савета Вышэйшай атэстацыйнай камісіі Рэспублікі Беларусь па хіміі. Вёў актыўнае супрацоўніцтва з навуковымі арганізацыямі і вытворчымі прадпрыемствамі Германіі, Аўстрыі, Польшчы, Кітая і іншых краін. Уладзімір Сяргеевіч – сапраўдны член Еўрапейскай акадэміі навук і мастацтваў, ганаровы акадэмік Хэнаньской акадэміі навук (Кітай). Ён з'яўляецца членам рэдкалегій часопіса “Весці НАН Беларусі. Серыя хімічных навук”, міжнародных часопісаў “Reactive and Functional Polymers”, “Химическая технология”, “Химия и технология воды”. Яму належаць больш за 600 навуковых прац, у тым ліку 5 манаграфій, 54 патэнта і аўтарскіх пасведчанняў на вынаходніцтвы. Ім падрыхтавана 32 кандыдата і 2 доктара хімічных навук.

Фундаментальныя веды і вялікі творчы патэнцыял дазволілі дасягнуць фізікахіміку, заслужанаму дзеячу навукі Рэспублікі Беларусь, акадэміку НАН Беларусі, доктару хімічных навук, прафесару У.С. Салдатаву высокіх вынікаў у навуковай і навукова-педагагічнай дзейнасці. За заслугі ў развіцці навукі ён узнагароджаны ордэнам “Знак пашаны” і медалямі.

Матэрыял падрыхтаваны ў 2012 г.