Кірыла Пракопавіч Чарноў нарадзіўся ў вёсцы Амяленская Слабада Бабруйскага раёна Магілёўскай вобласці ў сям’і селяніна. З малых гадоў працаваў падзёншчыкам. Вучыцца ў школе змог пасля заканчэння грамадзянскай вайны. Пасля атрымання няпоўная сярэдняй адукацыі працаваў слесарам на Бабруйскім лесакамбінаце.

З 1929 г. знаходзіўся на службе ў Чырвонай Арміі. Да вайны скончыў Аб’яднаную ваенную школу, затым Вышэйшую афіцэрскую артылерыйскую школу. Са жніўня 1941 г. К.П. Чарноў – на фронце. У бітве пад Сталінградам камандаваў знішчальна-супрацьтанкавым артылерыйскім палком, у ходзе Курскай бітвы – асобнай артылерыйскай брыгадай.

У ходзе баёў на Дняпры ў верасні 1943 г. артылерысты брыгады Чарнова знішчылі шэсць нямецкіх танкаў, восем бронемашын і БТР, дзве танкеткі і не дапусцілі прарыву праціўніка ў тыл нашай арміі.

У кастрычніку 1943 г. брыгада Чарнова вяла цяжкія баі за плацдарм на правым беразе Дняпра. Два дні артылерыйскія палкі мужна трымалі абарону, адбілі ўсе варожыя атакі і забяспечылі не толькі ўтрыманне плацдарма, але і значнае яго пашырэнне. За час баёў было падбіта 35 танкаў і знішчана да двух палкоў пяхоты праціўніка.

Указам Прэзідыума Вярхоўнага Савета СССР ад 24 снежня 1943 г. за мужнасць, адвагу і гераізм, праяўленыя ў барацьбе з нямецка-фашысцкімі захопнікамі, Кірылу Пракопавічу Чарнову было прысвоена званне Героя Савецкага Саюза з уручэннем ордэна Леніна і медаля «Залатая Зорка».

У час баёў у Заходняй Украіне Кірыла Пракопавіч быў цяжка паранены. Пасля лячэння ў шпіталі зноў вярнуўся на фронт, удзельнічаў у разгроме нямецка-фашысцкіх войск у Венгрыі і Аўстрыі.

У 1946 г. скончыў Вышэйшыя акадэмічныя артылерыйскія курсы. З 1961 г. К.П. Чарноў – у запасе. Узнагароджаны двума ордэнамі Леніна, трыма ордэнамі Чырвонага Сцяга, ордэнамі Кутузава ІІІ ступені, Аляксандра Неўскага, Айчыннай вайны І ступені, Чырвонай Зоркі, медалямі. У Ніжнім Ноўгарадзе на доме, у якім жыў К.П. Чарноў, устаноўлена мемарыяльная дошка.

Пераклад 2021 г. матэрыялаў інтэрнэт-праекта «Герои страны».