Рыгор Васільевіч Дзідзенка нарадзіўся ў в. Навапаўлаўка Уральскай вобласці (Казахстан). Скончыў Варонежскае тэатральнае вучылішча (1938). Пасля вучобы адразу быў прызваны ў армію. У 1938–1941 гг. ён чытальнік Ансамбля песні і танца пагранвойск БССР. У час Вялікай Айчыннай вайны Р. В. Дзідзенка з'яўляўся ўдзельнікам партызанскага руху на тэрыторыі Пухавіцкага раёна Мінскай вобласці. Стаў вядомы сярод партызан як кіраўнік мастацкага ансамбля атрада імя М. Кутузава. Ён быў аўтарам і выканаўцам актуальных для таго часу вершаў, частушак на ваенную тэматыку, эстрадных заставак-рэпрыз. Спецыяльна для ансамбля напісаў «Партызанскую песню» (першакрыніца – песня «Раскинулось море широко...»). Папулярнымі ў той час былі таксама яго вершы і прыпеўкі «Пленница», «Спор», «Слушай, Беларусь», «Наташа», «На весь размах» і інш. Літаратурныя творы Р. В. Дзідзенка не толькі гучалі ў праграмах ансамбля, але і рэгулярна друкаваліся ў партызанскім рукапісным часопісе «Кутузавец», рэдактарам якога ён быў. З 1946 г. з'яўляўся начальнікам Мінскага абласнога аддзела мастацтва. З 1947 г. працаваў у Белдзяржфілармоніі артыстам размоўнага жанру. Ён аўтар і выканаўца сатырычных куплетаў, мініяцюр, фельетонаў.У складзе канцэртных брыгад у 1950–1960 гг. часта гастраліраваў па гарадах і вёсках Савецкага Саюза, быў незаменным канферансье на музычных фестывалях, дэкадах. З 1963 г. заслужаны артыст БССР.

Матэрыял падрыхтаваны ў 2018 г.