Васіль Канстанцінавіч Зыль нарадзіўся ў вёсцы Востраў Смалявіцкага раёна Мінскай вобласці. Закончыў няпоўную сярэднюю школу. У 1923 г. трапіў у Чырвоную Армію, у 1929 г. закончыў Маскоўскую артылерыйскую школу імя Красіна, вучыўся ў Ваенна-артылерыйскай акадэміі (1931–1933). З чэрвеня 1941 г. на фронце.

Камандзір 299-га гвардзейскага мінамётнага палка (10-ы гвардзейскі танкавы корпус, 4-я танкавая армія, 1-ы Украінскі фронт) гвардыі падпалкоўнік Зыль вызначыўся ў ходзе Вісла-Одэрскай аперацыі: у ноч на 26 студзеня 1945 г. мінамётны полк пад яго камандаваннем адным з першых фарсіраваў раку Одэр.

За ўмелае камандаванне артпалком і праяўленыя пры гэтым мужнасць і гераізм Указам Прэзідыума Вярхоўнага Савета СССР ад 10 красавiка 1945 г. падпалкоўніку Васілю Канстанцінавічу Зылю было прысвоена званне Героя Савецкага Саюза з уручэннем ордэна Леніна і медаля “Залатая Зорка”.

У 1946 г. В.К. Зыль скончыў Вышэйшую афіцэрскую школу артылерыі і працягваў службу ва Узброеных Сілах СССР. З 1954 г. – у запасе.

Васіль Канстанцінавіч Зыль узнагароджаны двума ордэнамі Леніна, чатырма ордэнамі Чырвонага Сцяга, ордэнамі Аляксандра Неўскага, Айчыннай вайны І і ІІ ступеняў, медалямі, ганаровы грамадзянін горада Болхаў Арлоўскай вобласці Расіі. Імя Героя носіць школа ў Калінінградзе.

Пераклад 2020 г. матэрыялаў інтэрнэт-праекта “Герои страны”.