Сяргей Уладзіміравіч нарадзіўся 18 чэрвеня 1937 г. у п. Ратамка на Міншчыне. Скончыў Усесаюзны iнстытут кiнематаграфii (1965). У 1954–1962 гг. і з 1965 г. працаваў на кiнастудыi "Беларусьфiльм". Здымаў мастацкія, навукова-папулярныя, дакументальныя фільмы, лірычныя замалёўкі аб прыродзе, кінастужкі пра дзеячаў мастацтва. Яго творчасці ўласціва пачуццё грамадзянскасці, адлюстраванне характэрных прыкмет часу, стварэнне жывых паўнакроўных партрэтаў людзей.

У якасці аператара ўдзельнічаў у здымках стужак: “Вайна пад стрэхамi" (1967), “Сыны iдуць у бой" (1969), “Белая зямля” (1970), “Дзядзька Якуб” (1981), “Цішка Гартны” (1988), “Два стагоддзі Адама Міцкевіча” (1998) і інш. За аператарскую работу ў фільмах “Свет вяртлявай камышоўкі”, “Сцены старажытнай Гародні”, “Крэва”, “Навагрудак” быў узнагароджаны дыпломам VI Міжнароднага тэлефорума “Экомир-2000” (г.п. Карэлічы, Гродзенская вобласць). У якасці рэжысёра зняў фільмы: “Кола” (1992), “Хутар” (1994), “Евангелле ад маці” (1996), “Бядуля (1998), “Жыві ў свабодзе” (1998) і інш. З’яўляўся аўтарам і суаўтарам сцэнарыяў уласных фільмаў.

У 1981 г. таленавітаму аператару і рэжысёру было прысвоена ганаровае званне “Заслужаны дзеяч мастацтваў Беларусі”. Творчасці Сяргея Уладзіміравіча прысвечаны дакументальны фільм “Отдельный человек” (2001, рэжысёр М. Жданоўскі). 

Памёр С.У. Пятроўскі 9 снежня 1999 г.

Матэрыял падрыхтаваны Мінскай раённай бібліятэкай у 2012 г.