Якаў Рыгоравіч Рыер нарадзіўся ў Мінску ў сям’і гісторыка. У 1955 г. бацькі пераехалі ў Магілёў. У 1965 г. ён скончыў сярэднюю школу і паступіў на гісторыка-геаграфічны факультэт Магілёўскага дзяржаўнага педагагічнага інстытута (з 1997 г. Магілёўскі дзяржаўны ўніверсітэт імя А.А. Куляшова). Пасля атрымання дыплома (1969) працаваў навуковым супрацоўнікам у Магілёўскім абласным краязнаўчым музеі. З 1975 г. у Магілёўскім дзяржаўным педагагічным інстытуце займаў пасады: старшага выкладчыка (1978–1983), дацэнта (1983–1995), прафесара (1995–1999), загадчыка кафедры ўсеагульнай гісторыі (з 1999 г.). Кандыдацкую дысертацыю Я.Р. Рыер абараніў у 1980 г., доктарскую ў 1993 г.

Сфера навуковых інтарэсаў вучонага – сярэдневяковая аграрная гісторыя і археалогія Еўропы, гісторыя сусветных цывілізацый у старажытнасці сярэднявечча. Распрацаваў праблемы сярэдневяковай вёскі ўсходняй і цэнтральнай Еўропы. Абследаваў археалагічныя помнікі Магілёўскай вобласці, кіраваў раскопкамі паселішча і могільніка X–XVI ст. каля Г. Чавусы. Ён з'яўляецца аўтарам каля 230 навуковых і вучэбна-метадычных публікацый, членам рэдкалегіі часопіса «Веснік Магілёўскага дзяржаўнага ўніверсітэта імя А.А. Куляшова», уваходзіць у склад рэдакцыйнага савета «Беларускага гістарычнага часопіса». Вучоны удзельнічаў у шматлікіх навуковых канферэнцый, у тым ліку міжнародных, з'яўляецца каардынатарам міжнародных навукова-практычных канферэнцый «Романовские чтения» (Магілёў 2006, 2011).

Якаў Рыгоравіч Рыер узнагароджаны знакам «Выдатнік адукацыі Рэспублікі Беларусь» (2003), шматлікімі ганаровымі граматамі. Сярод якіх – Нацыянальнай Акадэміі навук (2008), Беларускага рэспубліканскага фонду фундаментальных даследаванняў (2009), Савета Міністраў Рэспублікі Беларусь (2013) і Міністэрства адукацыі Рэспублікі Беларусь (2014).

Матэрыял падрыхтаваны УК «Магілёўская абласная бібліятэка імя У.І. Леніна» ў 2017 г.