Вера Якаўлеўна Ляшук добра вядома ў рэспубліцы не толькі як вядучы спецыяліст па методыцы выкладання літаратуры ў школе і ВНУ, але і як літаратуразнаўца і крытык. Выхад у свет шэрагу яе навуковых прац заўсёды з’яўляецца значнай падзеяй. Актуальныя сваёй гуманістычнай канцэпцыяй бачання літаратурных з’яў, глыбокай аналітычнай думкай, блізкай сучасніку, прынцыповасцю маральна-этычных пазіцый і жыццесцвярджальнай мудрасцю, яны запатрабаваны вялікай аўдыторыяй настаўнікаў, студэнтаў, вучняў.

Нарадзілася В. Я. Ляшук у в. Марозавічы Брэсцкага раёна Брэсцкай вобласці ў сялянскай сям’і. Настаўнічаць марыла з дзяцінства і пасля заканчэння сямігодкі ў в. Малыя Зводы паступіла ў Брэсцкае педагагічнае вучылішча. У 1959 г. з адзнакай скончыла філалагічны факультэт Брэсцкага педагагічнага інстытута імя А. С. Пушкіна. Першыя гады настаўніцтва прайшлі ў Дамачаўскай сярэдняй школе Брэсцкага раёна. Працавала з вялікім энтузіязмам. Асабліва любіла наладжваць пазакласную работу вучняў: кіравала драматычным гуртком, сістэматычна праводзіла літаратурныя вечарыны, у час канікул арганізоўвала экскурсіі і паходы. У жніўні 1961 г. была прызначана загадчыкам навучальна-выхаваўчай працы Тамашоўскага дзіцячага дома, паралельна вяла некалькі класаў у Камароўскай сярэдняй школе – на радзіме касманаўта П. Клімука.

У 1963 г. В. Я. Ляшук пачала працаваць на кафедры беларускай літаратуры Брэсцкага педагагічнага інстытута імя А. С. Пушкіна, дзе прайшла шлях ад выкладчыка да загадчыка кафедры, прафесара (у 1980–1985 гг. была дэканам філалагічнага факультэта). Чытанне курса методыкі выкладання літаратуры, цесныя кантакты з педагогамі, уласны вопыт пераконвалі яе ў тым, што беларуская літаратура ў школе як прадмет часам не адыгрывае той функцыі, якая ёй прызначана. Настаўнікі агульнаадукацыйных школ не былі забяспечаны вучэбна-метадычнымі дапаможнікамі, і тады В. Я. Ляшук узялася за пяро. Адна за адной пачалі выходзіць кнігі. Асноўныя тэмы даследаванняў – беларуская літаратура, літаратурнае краязнаўства, методыка выкладання беларускай і рускай літаратур і моў у школе, праблемы педагогікі ў вышэйшай школе. Усе працы вызначаюцца практычнай накіраванасцю, актуальнасцю, змястоўнасцю, даходлівасцю стылю. Вера Якаўлеўна з’яўляецца аўтарам метадычных дапаможнікаў і падручнікаў, кніг для пазакласнага чытання. Сярод іх – “Вывучэнне эпічных твораў: 5–8 класы” (1987), “Міжпрадметныя сувязі ў выкладанні беларускай мовы і літаратуры” (1992; разам з Г. М. Малажай), “Вывучэнне беларускай літаратуры ў школе” (1994) і інш. Выступіла ініцыятарам выдання кніг па вывучэнні ў школе жыцця і творчасці вядомых беларускіх пісьменнікаў І. Мележа, А. Міцкевіча, Я. Коласа, Я. Брыля, М. Багдановіча і інш. Напісала нямала рэцэнзій, артыкулаў, водгукаў (надрукаваны ў рэспубліканскіх і абласных выданнях). Крытычныя працы 2008–2010 гг. у большасці прысвечаны творчасці пісьменнікаў-землякоў Н. Мацяш, З. Дудзюк, В. Гардзея, В. Жуковіча і інш. Былі выдадзены кнігі “Літаратура Берасцейшчыны” (1999), “Літаратурная Берасцейшчына” (2008; абедзве ў суаўтарстве з Г. М. Снітко), у якіх прасочваецца развіццё літаратуры рэгіёна з часоў старажытнасці да нашых дзён. Цікава і даходліва раскрыты творчыя сувязі з краем як вядомых, так і малавядомых пісьменнікаў.

Плённая педагагічная і навуковая праца В. Я. Ляшук адзначана высокімі ўзнагародамі: Граматай Вярхоўнага Савета БССР, медалём “Ветэран працы”, знакамі “Выдатнік асветы СССР”, “Выдатнік асветы БССР”. Яна заслужаны работнік вышэйшай школы Беларусі (1987), член-карэспандэнт Беларускай акадэміі адукацыі (1995).

Матэрыял падрыхтаваны ў 2013 г.