Беларусь можа ганарыцца вялікай колькасцю выдатных вучоных, якія плённа працуюць на карысць краіны. Да іх ліку трэба аднесці і прафесара Аляксея Васільевіча Мацвеева.

У 1960 г. ён скончыў геаграфічны факультэт Беларускага дзяржаўнага ўніверсітэта імя Леніна (БДУ) і быў накіраваны на працу ў Беларускі дзяржаўны інстытут па праектаванні водагаспадарчага і меліяратыўнага будаўніцтва (“Белдзіправодгас”) Міністэрства меліярацыі і воднай гаспадаркі БССР. У якасці галоўнага напрамку сваёй навуковай дзейнасці А.В. Мацвееў абраў геалогію чацвярцічнага перыяду. У 1964 г. малады вучоны паступіў у аспірантуру Інстытута геалагічных навук Міністэрства геалогіі СССР (цяпер Беларускі навукова-даследчы геолагаразведачны інстытут, БелНДГРІ). Тут пад кіраўніцтвам М.М. Цапенка ім была падрыхтавана і паспяхова абаронена кандыдатская дысертацыя па літалогіі ледавіковых адкладаў. У 1969 г. А.В. Мацвееў атрымаў пасаду вучонага сакратара Інстытута геалагічных навук (БелНДГРІ), пазней загадваў сектарам чацвярцічнай геалогіі. У 1971 г. выйшла яго першая манаграфія «Ледниковые отложения Белоруссии». Праз два гады была надрукавана «Геология антропогена Белоруссии», падрыхтаваная вучоным у суаўтарстве з Э.А. Ляўковым, Н.А. Махнач і інш. Гэтае выданне і цяпер не страціла сваёй актуальнасці.

На працягу ўсёй навуковай дзейнасці А.В. Мацвееў вывучае розныя праблемы геалогіі антрапагену, палеагеаграфіі, геамарфалогіі, неатэктонікі. Ён вылучыў і ахарактарызаваў асноўныя этапы ледавіковага літагенезу, прыняў удзел у распрацоўцы новай класіфікацыі антрапагенавых адкладаў, вызначыў заканамернасці экзарацыі, фарміравання пераносімых марэн і далейшай ледавіковай седыментацыі. Вынікам гэтых даследаванняў стала доктарская дысертацыя «Ледниковые отложения антропогена Белоруссии (условия залегания, вещественный состав, литогенез)», якую А.В. Мацвееў абараніў у Вільнюскім універсітэце (Літва, 1975), і манаграфія «Ледниковая формация антропогена Белоруссии» (1976).

У другой палове 1970-х гг. вучоным была распрацавана серыя геамарфалагічных карт як асобных раёнаў Беларусі, так і тэрыторыі краіны цалкам. З 1978 г. А.В. Мацвееў стаў супрацоўнікам Інстытута геахіміі і геафізікі АН БССР (цяпер у складзе БелНДГРІ), дзе па яго прапанове была створана лабараторыя дынамікі ландшафтаў. У гэты перыяд вучоны праявіў інтарэс да сучаснай геадынамікі, экалагічнай геалогіі, сумесна з калегамі падрыхтаваў шэраг манаграфій: «Неотектоника территории Припятского прогиба» (1980), «Рельеф Белорусского Полесья» (1982), «Неотектоника и полезные ископаемые Белорусского Полесья» (1984), «Рельеф Белоруссии» (1988).

З пачатку 1990-х гг. А.В. Мацвееў звярнуўся да пытанняў утварэння пакладаў карысных выкапняў (будаўнічыя матэрыялы, алмазы, россыпы цяжкіх металаў і інш.), стварэння прагнозаў іх радовішчаў. Ён удзельнічаў у распрацоўцы “Программы ускорения геологоразведочных работ по развитию минерально-сырьевой базы Республики Беларусь на 1996–2000 годы и мерах по её реализации”.

У 1993–1998 гг. А.В. Мацвееў – дырэктар Інстытута геахіміі і геафізікі НАН Беларусі (цяпер у складзе БелНДГРІ), у 1994 г. абраны акадэмікам НАН Беларусі.

У пачатку ХХІ ст. А.В. Мацвееў вывучае небяспечныя (экстрэмальныя) геалагічныя працэсы і асаблівасці іх праяўлення, прымае актыўны ўдзел у напісанні манаграфій «Геология Беларуси» (2001), «Линеаменты территории Беларуси» (2001), «Палеогеография кайнозоя Беларуси» (2002), «Основы геологии Беларуси» (2004), разам з калегамі складае геамарфалагічную карту, карту чацвярцічных адкладаў, карту сучасных геалагічных працэсаў для Нацыянальнага атласа Беларусі.

А.В. Мацвееў – прызнаны лідар беларускай школы геолагаў-чацвярцічнікаў, аўтар больш за 350 навуковых прац, у тым ліку больш за 20 манаграфій і кніг. Вучоны плённа працуе па міжнародных праграмах, з'яўляецца старшынёй Камісіі па вывучэнні чацвярцічнага перыяду і геамарфалогіі, старшынёй Савета па абароне доктарскіх і кандыдатскіх дысертацый. А.В. Мацвееў паспяхова сумяшчае навуковыя даследаванні з навукова-арганізацыйнай і педагагічнай дзейнасцю: пад яго кіраўніцтвам адбываецца шэраг буйных міжнародных сімпозіумаў і канферэнцый. Вучоны з'яўляецца дзеючым членам Міжнароднага саюза па вывучэнні чацвярцічнага перыяду (INQUA), віцэ-прэзідэнтам Беларускага геалагічнага таварыства, старшынёй Беларускай антрапагенавай і геамарфалагічнай камісіі, членам эспертнага савета Дзяржкамітэта па навуцы і тэхналогіях Рэспублікі Беларусь і інш. А.В. Мацвееў – кіраўнік і выканаўца шэрагу праектаў Беларускага рэспубліканскага фонду фундаментальных даследаванняў, ён дапаўняе практычнымі распрацоўкамі даследаванні па «Государственной программе ориентированных фундаментальных исследований "Недра Беларуси"» і «Государственной программе геологоразведочных работ по развитию минерально-сырьевой базы Беларуси на 2006–2010 годы и на период до 2020 года.

За поспехі ў навуковай дзейнасці вучоны быў узнагароджаны медалём «За доблесную працу» (1970), Граматай Вярхоўнага Савета БССР (1977).У 1986 г. у складзе групы беларускіх геолагаў А.В. Мацвееў атрымаў Дзяржаўную прэмію БССР у галіне навукі і тэхнікі за распрацоўку тэарэтычных асноў чацвярцічнай геалогіі і ўкараненне іх у практыку геолагаразведачных работ, у 1998 г. яму было прысвоена ганаровае званне «Заслужаны дзеяч навукі Беларусі».

Матэрыял падрыхтаваны ў 2013 г.