У жывапісных творах В. Камарова адлюстраваны мінулае і сучаснасць нашай краіны. Спасцігнуўшы глыбінны змест традыцыйнага жывапісу, ён стаў адметным майстрам, самабытныя творы якога з’яўляюцца візітнай карткай сучаснага мастацтва Магілёўшчыны.

Нарадзіўся В. Камароў у в. Міхайлаўск Магілёўскага раёна Магілёўскай вобласці. З 1965 па 1972 г. вучыўся ў Рэспубліканскай школе-інтэрнаце па музыцы і выяўленчаму мастацтву. Адукацыю працягваў на аддзяленні графікі Беларускага тэатральна-мастацкага інстытута (цяпер Беларуская дзяржаўная акадэмія мастацтваў). Менавіта ў гады навучання прыйшло асэнсаванне еднасці мастака і народа. Цудоўна валодаючы беларускай мовай, добра ведаючы звычаі і абрады, В. Камароў захапіўся гісторыяй Беларусі і Магілёўшчыны, што знайшло адлюстраванне ў яго творчасці. З 1976 г. пачаў удзельнічаць у шматлікіх выстаўках, у 1988 г. стаў членам Беларускага саюза мастакоў. З 2002 г. працуе ў Магілёўскім абласным краязнаўчым музеі імя Е.Р. Раманава.

Ужо раннія работы мастака вызначаліся высокім прафесійным майстэрствам, дакладнасцю гістарычнай праўды і надзвычай тонкім лірычным настроем. Першая серыя яго карцін – “Краявіды зямлі магілёўскай” (1683–1985) – адлюстроўвае своеасаблівасць і прыгажосць прыроды беларускай зямлі. Значная частка пейзажных твораў В. Камарова прысвечана гісторыі Магілёва: цыкл “Помнікі архітэктуры Магілёва” (1985–1986), карціны “Магілёў старажытны” (1988) і “Друкары і гравёры Магілёўскага Богаяўленскага брацтва”. У 1993 г. мастак напісаў серыю карцін “Славутыя магілёўцы”, куды ўвайшлі творы “Трафім Сурта”, “Максім і Васіль Вашчанкі”, “Спірыдон Собаль”, “Пётр Яўсіевіч”, “Пара-Левановіч”. Асобнае месца ў творчасці В. Камарова займае гісторыя Беларусі, якой прысвечаны графічныя работы “Вялікія і малыя гарады Беларусі” (1978), “Гонар і слава зямлі Полацкай” і “Горад праз стагоддзі (абедзве 1987), “Усяслаў”, “Самотная зорка”, “Дзяды” (усе 1991), “Горад, які не захаваўся” (1993) і інш. Значных поспехаў дасягнуў мастак у станковым жывапісе. Яго краявіды, выкананыя алеем, вызначаюцца абагуленасцю формы, багатай вобразнасцю, каларытнасцю фарбаў. Сярод іх можна адзначыць такія, як “Будзе новы сад” (2004), “Раніца” і “Сум” (абедзве 2005), “Дождж на Браслаўшчыне” (2007). У 2008 г. напісаны карціны “Белы горад. Раніца”, “Дзедава крыніца”, “Апошні шляхціц”, “Недаплецены бацькам кошык”.

Неардынарны мастак, майстар-універсал, В Камароў стварае не толькі графічныя і жывапісныя работы. Ён плённа працуе ў мастацтве інтэр’ераў, роспісах сценаў, дызайне эмблем і лагатыпаў. Яго творы захоўваюцца ў Нацыянальным мастацкім музеі Рэспублікі Беларусь, Магілёўскім абласным мастацкім музеі імя П. Масленікава, Магілёўскім абласным краязнаўчым музеі імя Е.Р. Раманава, Навагрудскім краязнаўчым музеі, музеі г. Габрава (Балгарыя).

Матэрыял падрыхтаваны ў 2014 г.