Дата рождения:
26.12.1976 Хрышчонавічы, в., Свіслацкі раён, Гродзенская вобласць
Краткая справка:
спартсменка (лёгкая атлетыка, штурханне ядра), заслужаны майстар спорту Беларусі, чэмпіёнка XXVII летніх Алімпійскіх гульняў (2000, Сіднэй), чэмпіёнка свету (2001), бронзавы прызёр чэмпіянату Еўропы (1998), узнагароджана ордэнам Айчыны ІІІ ступені
Варианты имени:
Карольчык-Правалінская Яніна Дзіславаўна
Имена на других языках:
Pravalinskaya-Karolchyk Yanina (английский); Провалинская-Корольчик Янина Диславовна (русский);
2120 символов
Справка
Яніна Карольчык нарадзілася ў в. Хрышчонавічы Свіслацкага раёна. Падчас вучобы ў школе яна займалася лёгкай атлетыкай і настольным тэнісам. На абласных спаборніцтвах сярод школьнікаў Гродзеншчыны юную спартсменку заўважыў трэнер Рыгор Сініцын. Ён прапанаваў Яніне перавесціся на вучобу ў Гродзенскае абласное вучылішча алімпійскага рэзерву і заняцца штурханнем ядра і кіданнем дыска.
Шматгадзінныя трэніроўкі, мнагакратныя паўторы кожнага элемента, адпрацоўка рухаў да аўтаматызму дапамаглі Яніне Карольчык заваяваць бронзавы медаль юніёрскага чэмпіянату Еўропы ў 1995 г.
У 1996 г. спартсменка ўдзельнічала ў моладзевым першынстве Еўропы, дзе выступала адразу ў дзвюх дысцыплінах – штурханні ядра і кіданні дыска – і ў кожнай з іх атрымала бронзавую ўзнагароду. У гэтым жа годзе Яніна Карольчык здала выпускныя экзамены ў Гродзенскім вучылішчы алімпійскага рэзерву і пераехала ў Мінск, дзе стала трэніравацца пад кіраўніцтвам заслужанага трэнера СССР і Беларусі Мечыслава Аўсяніка.
З пачатку 1998 г. спартсменка пакінула заняткі па кіданні дыска і сканцэнтравала сваю ўвагу на штурханні ядра. З-за раптоўнай смерці Мечыслава Аўсяніка Яніна Карольчык была вымушана перайсці да Аляксандра Яфімава, пад кіраўніцтвам якога пачала падрыхтоўку да Алімпійскіх гульняў 2000 г.
У алімпійскім Сіднэі да апошняга моманту не было зразумела, ці атрымае беларуская спартсменка медаль Алімпіяды. Ядро, якое штурханула Яніна Карольчык, праляцела 20 м 56 см. Так гродзенская спартсменка заваявала золата XXVII летніх Алімпійскіх гульняў. У 2001 г. яна стала лепшай на чэмпіянаце свету.
У чэрвені 2003 г. допінг-проба Яніны Карольчык выявіла ў арганізме спартсменкі забаронены прэпарат. У выніку яна была дыскваліфікавана на два гады і не прымала ўдзел у летніх Алімпійскіх гульнях 2004 г. На двух наступных Алімпіядах – у Пекіне-2008 і Лондане-2012 – наша спартсменка засталася без медалёў.
У 2018 г. Яніна Дзіславаўна Правалінская-Карольчык завяршыла сваю спартыўную кар'еру.
Даведка падрыхтавана на аснове матэрыялаў сайта Нацыянальнага алімпійскага камітэта Рэспублікі Беларусь у 2019 г.
