Біяграфія Рышарда Антонавіча Мая – нетрадыцыйная і адметная, як і рэдкае спалучэнне імя і прозвішча. Рышард Май нарадзіўся на маленькім хутары пад Клецкам. Пяць гадоў адслужыў матросам-матарыстам на архіпелагу “Новая Зямля” па-за Палярным кругам, шмат гадоў працаваў вадалазам-выратавальнікам. Працу сумяшчаў з мастацкай творчасцю. У 1971 г. скончыў Беларускі дзяржаўны тэатральна-мастацкі інстытут (аддзяленне прамысловага дызайну). Амаль 10 гадоў працаваў у Мінскім аддзяленні Беларускай гандлёва-прамысловай палаты, дзе ствараў таварныя знакі для беларускіх прадпрыемстваў. Многімі з іх беларускія прадпрыемствы карыстаюцца да гэтага часу.

Поўную творчую свабоду Рышард Май знайшоў у жывапісе. Яго карціны называюць дэкаратыўнымі пано, падкрэсліваючы іх прыкладны, аздабленчы характар. Мастак не “адлюстроўвае рэчаіснасць”, яго жывапіс – гэта колеравая імправізацыя. Дыскрэтнасць, імправізацыйнасць жывапіснай манеры і відавочная музычнасць яго палотнаў роднасныя джазавым імправізацыям. Спецыялісты лічаць, што жывапіс Рышарда Мая – гэта не толькі імправізацыя і выкід эмоцый, але і гульня – з кантрастам, рытмам, выпадковасцямі фактуры. “У творчасці Рышарда Мая пануе Гульня ўсяго з усім: колеру са святлом, плямы з лініяй, холаду з цеплынёй, плоскасці з прасторай, кантрасту з гармоніяй, фантазій з успамінамі, ледзьве ўлоўных вобразаў з адчувальнасцю фактур і ўсяго разам, безумоўна, з гледачом”, – так лічыць кіраўнік аўтарскай некамерцыйнай канцэптуальнай галерэі “Брама” Л. Фінкельштэйн. Рышард Май пастаянны ўдзельнік групавых выставак у галерыі “Брама”, а таксама некалькіх персанальных, у тым ліку і юбілейнай (2001).

Значнае месца ў жыцці мастака займае ўнікальны вопыт творчага выхавання дзяцей. З сярэдзіны 1970-х гг. Рышард Антонавіч кіруе дзіцячай мастацкай студыяй выяўленчага мастацтва Цэнтра дадатковай адукацыі дзяцей і моладзі “АРТ” г. Мінска (вул. Суворава, 18). У студыю Рышарда Мая прыходзяць дзеці ад трох гадоў. Галоўны прынцып сваёй педагагічнай дзейнасці мастак сфармуляваў адным выразам: “вучыць, не павучаючы”. Рышард Май не вучыць маляваць, ён уздзейнічае на дзіцячую душу з верай, што ў кожным чалавеку ад нараджэння закладзены жывапісны геній. Педагагічная пазіцыя Рышарда Мая заснавана на прыярытэце развіцця цэласнай унікальнай асобы. Мастак давярае інтуітыўнаму, прыроджанаму пачуццю гармоніі, якім надзелена кожнае дзіця. Работы студыйцаў адметныя сваёй выразнасцю і шчырасцю выканання. Студыя Рышарда Мая пастаянна ўдзельнічае ў прадстаўнічых айчынных і міжнародных выстаўках і конкурсах дзіцячай мастацкай творчасці ў Маскве (1980), Чэхаславакіі і Новай Гвінеі (1981), Японіі (1985), Арменіі (1989), Галандыі (1992), Ізраілі (2000), Македоніі (2002, 2003, 2005), Індыі (2006), Партугаліі (2006) і інш. З 2000 г. работы студыйцаў удзельнічаюць у штогадовай Сусветнай выстаўцы-конкурсе дзіцячых мастацкіх школ у г. Тайбэй (Тайвань), з 2001 г. – у шматгадовым Міжнародным конкурсе дзіцячага жывапісу ў г. Труа (Францыя) і інш. У маі 2007 г. у Нацыянальным мастацкім музеі Рэспублікі Беларусь з вялікім поспехам прайшла выстаўка “Рышард Май і яго вучні”, на якой экспанаваліся творы майстра і яго выхаванцаў.

Некалькі гадоў таму Беларускі дзіцячы фонд прысвоіў кіраўніку заслужанай студыі выяўленчага мастацтва Цэнтра дадатковай адукацыі дзяцей і моладзі “АРТ” г. Мінска Рышарду Антонавічу Маю ганаровае званне “Сябра дзяцей”.

Матэрыял падрыхтаваны ў 2011 г.