Адметнае месца ў беларускай журналістыцы належыць Алегу Георгіевічу Слуку, вядомаму вучонаму, гісторыку, педагогу.

Ён нарадзіўся ў в. Лабковіца Асіповіцкага раёна Магілёўскай вобласці ў сялянскай сям’і. Пасля заканчэння Ліпеньскай сярэдняй школы працаваў у мясцовым калгасе «Чырвоны сцяг», потым сувязістам на чыгунцы ў г. Кандалакшы Мурманскай вобласці, адкуль быў прызваны ў армію. З’яўляўся пазаштатным карэспандэнтам ваенных газет, вучыўся ў дывізіённай партыйнай школе і рыхтаваўся да паступлення ў Беларускі дзяржаўны ўніверсітэт імя У. І. Леніна (БДУ). У 1964 г. стаў студэнтам факультэта журналістыкі вышэйназванай навучальнай установы. У гады вучобы А. Г. Слука супрацоўнічаў з рэдакцыямі розных газет, Беларускім радыё, займаўся навуковай і грамадскай работай. У 1968 г. закончыў БДУ і паступіў у аспірантуру. У 1971 г. абараніў кандыдацкую дысертацыю на тэму «Молодежная печать Белоруссии, 1918–1925 гг.» і пачаў працаваць выкладчыкам на факультэце журналістыкі, потым дацэнтам кафедры гісторыі журналістыкі і літаратуры. Гісторыя, тэорыя і практыка беларускіх, савецкіх і замежных сродкаў камунікацый сталі аб’ектам яго навуковых даследаванняў і педагагічнай дзейнасці. Вучоны распрацаваў лекцыйныя курсы па айчыннай і замежнай журналістыцы, падрыхтаваў метадычныя дапаможнікі для студэнтаў, напісаў і выдаў праграму курса па тэхналогіі прапаганды ў сродках інфармацыі еўрапейскіх краін. Займаўся даследаваннем айчыннай журналістыкі, вывучаў яе ўплыў на працэсы фарміравання беларускай нацыі, народа і дзяржаўнасці. У 1986 г. А. Г. Слука абараніў у Ленінградскім дзяржаўным універсітэце імя А. А. Жданава доктарскую дысертацыю на тэму «Комсомольская печать Белоруссии: проблемы становления, развития и ее роль в строительстве социализма, 1918–1941 гг.», у 1989 г. стаў прафесарам. Працаваў дэканам факультэта журналістыкі (1986–1995), загадчыкам кафедры гісторыі журналістыкі і літаратуры (1988–1998). Навукова-даследчую і педагагічную дзейнасць сумяшчаў з актыўнай грамадска-палітычнай працай: быў сакратаром камітэта камсамола БДУ (1971–1973), намеснікам сакратара парткама ўніверсітэта па ідэалагічнай рабоце (1984–1986), у 1986 г. з’яўляўся сакратаром Саюза журналістаў БССР, у 1991 г. старшынёй спецыялізаванага савета факультэта журналістыкі па абароне кандыдацкіх дысертацый.

У 1995 г. А. Г. Слука стаў памочнікам Прэзідэнта Рэспублікі Беларусь па навуковай, адукацыйнай і сацыяльна-гуманітарнай сферы. Вучонаму была даручана праца па навукова-тэарэтычным абгрунтаванні асноў ідэалогіі беларускай дзяржаўнасці, вынікам якой сталі яго манаграфіі «Нацыянальная ідэя – шлях народа» (2005), «Ідэалогія беларускай дзяржаўнасці (метадалогія фарміравання)» (2007), «Нацыянальная ідэя» (2008), «Идеологические процессы в Беларуси» (2010) і інш.

У 1997 г. А. Г. Слука быў прызначаны намеснікам міністра адукацыі Рэспублікі Беларусь. Ён стаў арганізатарам распрацоўкі новай канцэпцыі развіцця навукі ва ўніверсітэтах, якая адпавядала запатрабаванням эканомікі беларускай дзяржавы (зацверджана Саветам Міністраў Рэспублікі Беларусь у 2000 г.), прымаў непасрэдны ўдзел у правядзенні рэформы агульнаадукацыйнай школы. Добра ведаючы замежны вопыт арганізацыі адукацыі, А. Г. Слука ўзначальваў дэлегацыі па гуманітарных пытаннях у ЗША, Казахстане, Вялікабрытаніі, Ізраілі, Іспаніі, Польшчы, а таксама на Сусветнай студэнцкай алімпіядзе ў Славеніі ў 1998 г. і Пекіне ў 2001 г., удзельнічаў у некалькіх міжнародных канферэнцыях. Ён уваходзіў у склад беларуска-в’етнамскай камісіі па навукова-тэхнічным супрацоўніцтве пры Савеце Міністраў Рэспублікі Беларусь; быў членам Прэзідыума Вышэйшай атэстацыйнай камісіі Рэспублікі Беларусь, Нацыянальнай камісіі па космасе пры Нацыянальнай акадэміі навук Беларусі, Міжведамаснай камісіі па барацьбе са злачыннасцю, карупцыяй і наркаманіяй пры Савеце бяспекі Рэспублікі Беларусь, кансультатыўнай групы АБСЕ пры Міністэрстве замежных спраў Рэспублікі Беларусь, рэдкалегій часопісаў «Беларуская думка», «Веснік БДУ», «Беларускі гістарычны часопіс» і выдавецтва «Беларуская Энцыклапедыя імя Петруся Броўкі». З 2002 па 2004 г. працаваў рэктарам Міжнароднага гумманітарна-эканамічнага інстытута. З 2004 г. з’яўляўся прафесарам кафедры гісторыі журналістыкі і літаратуры БДУ, з 2006 г. прафесарам кафедры філасофіі і метадалогіі ўніверсітэцкай адукацыі Рэспубліканскага інстытута вышэйшай школы.

Алег Георгіевіч Слука – адзін з вядучых спецыялістаў БДУ і Інстытута журналістыкі (створаны ў 2008 г.). З’яўляецца старшынёй савета па абароне кандыдацкіх і доктарскіх дысертацый па журналістыцы і намеснікам старшыні савета па абароне кандыдацкіх і доктарскіх дысертацый па паліталогіі ў БДУ. Пад яго кіраўніцтвам абаронена 19 кандыдацкіх дысертацый па журналісцкіх, палітычных і філасофскіх спецыяльнасцях грамадзянамі Беларусі, В’етнама, Афганістана, Беніна, Непала, Палесціны, Кыргызстана. Вучоны даследуе заканамернасці фарміравання ідэалогіі беларускай дзяржаўнасці, гістарычныя і сучасныя тэндэнцыі развіцця айчыннай журналістыкі. За плённую журналісцкую, навуковую і педагагічную дзейнасць А. Г. Слука ўдастоены званняў «Заслужаны журналіст Рэспублікі Беларусь» (2001) і «Заслужаны работнік Беларускага дзяржаўнага ўніверсітэта» (2010). Ён узнагароджаны Граматай Вярхоўнага Савета БССР (1978), Ганаровай граматай Савета Міністраў Рэспублікі Беларусь (2001), ганаровымі знакамі «Выдатнік адукацыі Рэспублікі Беларусь» (2001) і «Выдатнік друку Беларусі» (2006). З’яўляецца лаўрэатам прэмій Ленінскага камсамола БССР у галіне навукі і тэхнікі (1980), Саюза журналістаў БССР (1984), Беларускага саюза журналістаў «Залатое пяро» (2002).

Матэрыял падрыхтаваны ў 2016 г.