Імя ўраджэнца Слуцка Юрыя Шаўцова ведаюць ва ўсім свеце: больш за дзесяць гадоў ён гуляў за знакаміты мінскі СКА, стаў трохкратным уладальнікам Кубка Еўрапейскіх чэмпіёнаў, двухкратным уладальнікам Кубка кубкаў еўрапейскіх краін, шасцікратным чэмпіёнам СССР. Юрый яшчэ ў дзяцінстве выбраў гандбол: у Чавусах, куды пераехала сям’я Шаўцовых, дзейнічала секцыя ручнога мяча пад кіраўніцтвам Уладзіміра Мікалаевіча Шабуніна. Праз пэўны час Юрый Шаўцоў увайшоў у склад юнацкай зборнай Магілёўскай вобласці, потым пераехаў у Мінск і закончыў Рэспубліканскую школу-інтэрнат спартыўнага профілю.

Таленавітага юнака заўважыў галоўны трэнер мінскага СКА Спартак Мірановіч і запрасіў да сябе. У 1980-х – пачатку 1990-х гг. мінскі клуб быў адным з мацнейшых у Савецкім Саюзе, таму лепшыя гандбалісты мінскага СКА ўваходзілі ў зборную СССР. У складзе зборнай Юрый Шаўцоў у 1982 г. стаў чэмпіёнам свету, у 1988 г. заваяваў тытул алімпійскага чэмпіёна XXIV летніх Алімпійскіх гульняў.

У 1991–1992 гг. Юрый працаваў у Германіі, дзе выступаў за нямецкі клуб “Блау-Вайс Шпандау”. Пасля заканчэння спартыўнай кар’еры з 1992 да 2008 г. быў трэнерам шэрага нямецкіх гандбольных клубаў.

З сярэдзіны 2009 г. Юрый Анатольевіч Шаўцоў узначальвае нацыянальную мужчынскую зборную Беларусі па гандболе.

Даведка падрыхтавана на аснове матэрыялаў сайта Нацыянальнага алімпійскага камітэта Рэспублікі Беларусь у 2019 г.