Валянціна Аляксееўна Антаневіч нарадзілася ў Вільнюсе. У 1974 г. скончыла клас прафесара Г.С. Глушчанкі Беларускай дзяржаўнай кансерваторыі (зараз Беларуская дзяржаўная акадэмія музыкі). Працягвала навучанне ў аспірантуры Маскоўскага музычна-педагагічнага інстытута (зараз Расійская акадэмія музыкі) імя Гнесіных. З 1978 г. працавала выкладчыкам кафедры гісторыі музыкі Беларускай дзяржаўнай кансерваторыі. У 1982 г. абараніла кандыдацкую дысертацыю на тэму «Творчество композиторов Советской Белоруссии в его связях с национальным музыкальным фольклором (конец 50-х – 70-е годы)». У 2000 г. Валянціне Аляксееўне прысвоена навуковая ступень доктара мастацтвазнаўства за дысертацыю на тэму «Белорусское композиторское творчество в его связях с фольклором: историко-методологическое исследование». У гэтым жа годзе яна прызначана на пасаду прафесара, а ў 2002 г. − загадчыка кафедры беларускай музыкі. Валянціна Аляксееўна выкладала аўтарскі курс «История белорусской музыки XX века», дысцыпліну «Метадалогія сучаснага музыказнаўства», кіравала навуковай працай па вывучэнні гісторыі беларускага музычнага мастацтва ад старажытных часоў да сучаснасці, па даследаванні нацыянальнага фальклору ў кантэксце яго сувязі з кампазітарскай практыкай.

Антаневіч В.А. – аўтар шматлікіх навуковых прац, прысвечаных гісторыі беларускай музыкі XX ст, яе сувязям з фальклорам і агульным развіццём беларускай нацыі. Сярод іх – «Белорусская камерно-инструментальная музыка в 60–80-е годы» (1991), «Белорусское композиторское творчество в его связях с фольклором» (1999), «Белорусская музыка XX века: композиторское творчество и фольклор» (2003) і інш. Падрыхтавала артыкулы для «Энцыклапедыі літаратуры і мастацтва Беларусі», «Беларускай энцыклапедыі», энцыклапедычнага слоўніка «Grove» (Вялікабрытанія).

У 2001 г. Валянціна Аляксееўна ўдастоена Ганаровай граматы Міністэрства культуры Рэспублікі Беларусь і Спецыяльнай прэміі Прэзідэнта Рэспублікі Беларусь.

Матэрыял падрыхтаваны ў 2021 г.