Юрый Яўгенавіч Атаманаў нарадзіўся ў г. Хабараўск (Расія). У 1964 г. скончыў Беларускі політэхнічны інстытут (цяпер Беларускі нацыянальны тэхнічны ўніверсітэт) і пачаў працаваць інжынерам-канструктарам вопытна-канструктарскага бюро Мінскага трактарнага завода (1964–1966). За гады практычнй дзейнасці на заводзе Ю.Я. Атаманаў стаў выдатным спецыялістам. У 1969 г. ён быў запрошаны на пасаду выкладчыка кафедры “Трактары” аўтатрактарнага факультэта БПІ–БНТУ, а ў 1975 г. абараніў дысертацыю на вучоную ступень кандыдата тэхнічных навук. Асноўным накірункам дзейнасці вучонага сталі даследаванні ў галіне дынамікі колавых машын, цягавай дынамікі, кіруемасці і ўстойлівасці руху колавых машын, у тым ліку паўнапрывадных. У 1997 г. Ю.Я. Атаманаў быў абраны прафесарам кафедры “Трактары” і займаў гэтую пасаду да 2002 г.

За гады навуковай дзейнасці Ю.Я. Атаманаў стаў аўтарам 135 навукова-метадычных работ, у тым ліку 6 вучэбных дапаможнікаў, 2 падручнікаў, 6 манаграфій і атрымаў патэнты на 29 вынаходак, падрыхтаваў двух кандыдатаў тэхнічных навук. У сваіх працах вучоны вялікую ўвагу надаваў распрацоўцы методыкі выбару рацыянальных параметраў колавых трактараў. Вынікі яго практычнай дзейнасці былі адзначаны бронзавым медалём ВДНГ СССР. У 1996 г. за цыкл падручнікаў і вучэбных дапаможнікаў для студэнтаў вышэйшых навучальных устаноў Ю.Я. Атаманаў у складзе творчага калектыву стаў лаўрэатам Дзяржаўнай прэміі Рэспублікі Беларусь. Вучэбны комплекс пад агульнай назвай “Трактары” быў прысвечаны пытанням у галіне тэорыі, канструявання, разліку, выпрабавання і эксплуатацыі трактароў. У комплексе была ўпершыню ажыццёўлена ідэя міжпрадметных сувязей агульнатэхнічных і прафілюючых дысцыплін, закладзены прынцыпы бесперапыннай фізіка-матэматычнай падрыхтоўкі студэнтаў, створана трывалая аснова для вывучэння фундаментальных і агульнатэхнічных дысцыплін.

Сёння вучоны, кандыдат тэхнічных навук Ю.Я. Атаманаў з’яўляецца дацэнтам кафедры “Трактары” аўтатрактарнага факультэта БНТУ.

Матэрыял падрыхтаваны ў 2012 г.