Дзмітрачкоў Пётр Фролавіч

Дата рождения: 07.06.1937 Хоцімскі раён, Магілёўская вобласць

Дата смерти: 12.12.2021

Краткая справка: вучоны-гісторык, аўтар шэрага вучэбна-метадычных дапаможнікаў для вышэйшай школы, заслужаны работнік адукацыі Беларусі

Имена на других языках: Дмитрачков Пётр Фролович (русский);

Беларускі гісторык Пётр Фролавіч Дзмітрачкоў нарадзіўся ў в. Ганнаўка (цяпер в. Бярозкі) Хоцімскага раёна Гомельскай вобласці ў сялянскай сям'і. У 1965 г. скончыў гісторыка-геаграфічны факультэт Магілёўскага педагагічнага інстытута імя А.А. Куляшова. У 1973 г. пры Інстытуце гісторыі АН БССР абараніў кандыдацкую дысертацыю на тэму «Участие трудящихся в работе местных Советов БССР (1966–1970 гг.)». У 1975 г. быў прызначаны дэканам гістарычнага факультэта Магілёўскага педагагічнага інстытута імя А.А. Куляшова, у 2003 г. стаў прафесарам, з 2005 г. выкладае на кафедры гісторыі і культуры Беларусі.

Педагагічную дзейнасць П.Ф. Дзмітрачкоў сумяшчае з навуковай. Ён з'яўляецца аўтарам шматлікіх прац па гісторыі Беларусі, у якіх даследуе праблемы ўзнікнення і развіцця дзяржаўнасці на беларускіх землях, разнастайныя аспекты палітычнай гісторыі Вялікага Княства Літоўскага (ВКЛ), вывучае этнічныя пытанні, звязаныя з фарміраваннем беларускай народнасці. Вынікам навуковай работы сталі вучэбныя дапаможнікі «Аб паходжанні беларусаў, фарміраванні і развіцці беларускай народнасці» (1992), «Беларусь у ІХ – першай палове ХІІІ стст.» (1994), «Старажытная гісторыя Беларусі» (1999), «Беларусь у другой палове ХVІІ–ХVІІІ стст.» (2000, разам з В.Л. Маразевічам), «Беларусь у складзе Вялікага княства Літоўскага, другая палова ХІІІ – першая палова ХVІІ стст.» (2003), «Беларусь у сярэдневяковы перыяд (V – першая палова XIII ст.)» (2007), «История зарождения и развития государственности на белорусских землях: (IX–XVIII в.)» (2008), «Белорусский этнос: истоки, становление и развитие» (2010), «История Беларуси. С древнейших времен до конца XVIII в.» (2015) і інш.

Прафесар П.Ф. Дзмітрачкоў актыўна ўдзельнічаў у грамадскай дзейнасці. Ён з'яўляўся членам Дзяржаўнай камісіі па падрыхтоўцы вучэбных дапаможнікаў у гуманітарна-грамадазнаўчай сферы (1995); у 2006 г. быў абраны дэлэгатам Трэцяга Усебеларускага народнага сходу. За плённую навуковую, педагагічную і грамадскую працу П.Ф. Дзмітрачкоў узнагароджаны знакамі «Выдатнік асветы СССР» (1985), «Выдатнік народнай асветы БССР» (2006). У 1998 г. атрымаў званне «Заслужаны работнік адукацыі Рэспублікі Беларусь». У 1999 г. стаў членам-карэспандэнтам Беларускай акадэміі адукацыі.У 2004 г. атрымаў падзяку ад Прэзідэнта Рэспублікі Беларусь.

Матэрыял падрыхтаваны ў 2017 г.