Залуцкі Іосіф Віктаравіч, адзін з заснавальнікаў кірунку пластычнай хірургіі ў анкалогіі, нарадзіўся ў в. Мумішкі Пастаўскага раёна Віцебскай вобласці. У 1969 г. скончыў Маладзечанскае медыцынскае вучылішча. З 1969 па 1971 г. служыў у Савецкай Арміі. У 1978 г. з адзнакай скончыў лячэбны факультэт Мінскага дзяржаўнага медыцынскага інстытута. З 1982 па 1985 г. вучыўся ў аспірантуры. У 1986 г. абараніў кандыдацкую дысертацыю на тэму «Пластические операции при комбинированном лечении больных меланомой кожи с применением предоперационной терморадиотерапии», у 1994 г. – доктарскую дысертацыю «Восстановление тканей лоскутами с осевым кровообращением при лечении местно-распространенных злокачественных новообразований наружных локализаций и поздних лучевых повреждений».

Прафесійная дзейнасць І. В. Залуцкага звязана з Навукова-даследчым інстытутам анкалогіі і медыцынскай радыялогіі Міністэрства аховы здароўя БССР (зараз Рэспубліканскі навукова-практычны цэнтр анкалогіі і медыцынскай радыялогіі імя М.М. Аляксандрава). У 1978–1982 гг. працаваў клінічным ардынатарам, урачом радыелагічнага аддзялення. Пасля заканчэння аспірантуры вярнуўся на працу ў інстытут і стаў малодшым, затым старэйшым навуковым супрацоўнікам лабараторыі гіпертэрміі і клінічнай тэрапіі (1985–1990). З 1990 па 1994 г. быў старэйшым навуковым супрацоўнікам, кіраўніком, вядучым навуковым супрацоўнікам аддзялення рэабілітацыі і брахітэрапіі. У 1994–2000 гг. кіраваў аддзяленнем агульнай анкалогіі і пластычнай хірургіі. З 2000 па 2009 г. быў дырэктарам інстытута. Пасаду сумяшчаў з працай загадчыка кафедры анкалогіі Беларускай медыцынскай акадэміі паслядыпломнай адукацыі (1999–2007).

У 2000 г. Іосіфу Віктаравічу прысвоена вучонае званне прафесара. З 2001 г. з’яўляўся галоўным пазаштатным анколагам Міністэрства аховы здароўя Рэспублікі Беларусь. У 2004 г. выбраны членам-карэспандэнтам Нацыянальнай акадэміі навук Беларусі. З 2010 г. быў намеснікам акадэміка-сакратара Аддзялення медыцынскіх навук НАН Беларусі, дырэктарам Інстытута фізіялогіі НАН Беларусі. З’яўляўся членам рэдакцыйных калегій навуковых часопісаў «Весці НАН Беларусі. Серыя медыцынскіх навук», «Здравоохранение», «Медицинские новости», «Украі’нський радіологічнйй журнал», галоўным рэдактарам штогадовых зборнікаў навуковых прац «Актуальные проблемы онкологии и медицинской радиологии».

Навуковыя даследаванні І.В. Залуцкага прысвечаны распрацоўцы і ўкараненню ў клінічную практыку метадаў дыягностыкі, лячэння і рэабілітацыі анкалагічных хворых; вывучэнню магчымасці рэканструкцыйных і аднаўленчых аперацый як сродку медыцынскай рэабілітацыі; прафілактыцы і ранняму выяўленню пухлін. Вучонаму належыць распрацоўка метадаў мікрахірургіі пры лячэнні пухлін скуры, мяккіх тканак, касцей, малочнай залозы, галавы і шыі. Дзякуючы І. В. Залуцкаму ўведзена метадалогія органазахоўваючых і рэканструкцыйна-ўзнаўленчых аперацый пры вонкавых анкалагічных пухлінах і ўскладненнях пасля прамянёвай і камбінаванай тэрапіі.

Ён з’яўляецца аўтарам больш за 300 навуковых і навукова-метадычных прац, у тым ліку 9 манаграфій. Сярод іх – «Неоадъювантная полихимиотерапия больных с распостраненными формами рака гортани Т3-4NO-3МО» (1999), «Меланома кожи» (2000, у суаўтарстве), «Вторичная лимфедема верхней конечности у онкологических больных» (2004, у суаўтарстве), «Эпидемиология злокачественных новообразований в Беларуси» (2006, у суаўтарстве) і інш.

Матэрыял падрыхтаваны ў 2020 г.