Аляксандр Міхайлавіч Мызгін нарадзіўся ў Гомелі. У дзесяцігадовым узросце пачаў наведваць спартыўную дзіцяча-юнацкую школу алімпійскага рэзерву (СДЮШАР) № 6, дзе займаўся веславаннем на байдарках і каноэ пад кіраўніцтвам трэнера Уладзіміра Карлавіча Піліпенкі. Тэрміновую ваенную службу юнак прайшоў ў спартыўным клубе арміі Узброенных Сіл СССР (1983–1985). У 1990 г. скончыў факультэт фізічнай культуры Гомельскага дзяржаўнага ўніверсітэта імя Ф. Скарыны.

У пачатку 1980-х гг. Аляксандр Мызгін выступаў за спартыўнае таварыства «Працоўныя рэзервы», з'яўляўся членам зборнай каманды СССР па веславанні на байдарках і каноэ, у 1986 г. увайшоў у склад таварыства “Дынама”. З 1983 г. па 1997 г. займаўся веславаннем пад кіраўніцтвам трэнера Барыса Міхайлавіча Дайнэкі ў Гомельскай абласной школе вышэйшага спартыўнага майстэрства, потым на працягу пяці гадоў знаходзіўся ў складзе нацыянальнай каманды па веславанні на байдарках і каноэ ў якасці спартсмена-інструктара.

А.М. Мызгін – пераможца і прызёр шматлікіх спаборніцтваў і рэгат: пераможца міжнародных спаборніцтваў «Дружба» (1982), сямікратны чэмпіён СССР (1984–1992), двухкратны чэмпіён і сярэбраны прызёр чэмпіянатаў свету (1989–1990). Дасягненні спартсмена адзначаны шэрагам спартыўных званняў: «Майстар спорту» (1982), «Майстар спорту міжнароднага класа» (1985), «Заслужаны майстар спорту СССР» (1990). У 2008 г. ён скончыў Вышэйшую школу трэнераў і атрымаў вышэйшую трэнерскую катэгорыю. «Ганаровы дынамавец» А.М. Мызгін адзначаны шматлікімі ганаровымі граматамі Гомельскага аблвыканкама.

Пасля заканчэння актыўнай спартыўнай кар'еры Аляксандр Міхайлавіч быў прыняты на ваенную службу на пасаду інструктара па фізічнай культуры спартыўнай каманды ўнутраных войск Міністэрства ўнутранных спраў СССР. З 1994 г. падпалкоўнік Мызгін працуе трэнерам спартыўнай каманды ўнутраных войск МУС Рэспублікі Беларусь. Прымаў актыўны ўдзел у падрыхтоўцы майстроў спорту міжнароднага класа, удзельніц Алімпійскіх гульняў 2000 г., бронзавых прызёрак чэмпіянатаў свету і Еўропы Алесі Бакуновай і Наталлі Бандарэнка.

Сёння А.М. Мызгін вядзе актыўную грамадскую дзейнасць, прымае ўдзел у вучэбна-трэніровачных зборах і жыцці спартсменаў-ваеннаслужачых Беларускага фізкультурна-спартыўнага таварыства (БФСТ) «Дынама», аказвае практычную дапамогу трэнерам-настаўнікам па вяслярных відах спорту Гомельскай СДЮШАР № 1 БФСТ «Дынама», прымае ўдзел у розных спартыўных мерапрыемствах па развіцці ў Гомельскай вобласці веславання на байдарках і каноэ.

Матэрыял падрыхтаваны паводле інфармацыі, прадастаўленай Гомельскім аддзяленнем ГА “ВФКіС” у 2012 г.