Абалмасаў Аляксей Аляксандравіч

Дата рождения: 20.06.1980

Краткая справка: спартсмен (веславанне на байдарках) і трэнер, заслужаны майстар спорту Беларусі, чэмпіён XXIX летніх Алімпійскіх гульняў (2008, Пекін), чэмпіён свету (2005, 2009) і Еўропы (2005, 2006, 2009), сярэбраны (2002, 2010) і бронзавы (2005, 2006) прызёр чэмпіянатаў свету, сярэбраны (2004, 2006, 2007) і бронзавы (2001, 2008) прызёр чэмпіянатаў Еўропы, кавалер ордэна Айчыны ІІІ ступені, ганаровы грамадзянін Барысава і Барысаўскага раёна

Имена на других языках: Abalmasau Aliaksej (не определен); Абалмасов Алексей Александрович (русский);

Аляксей Абалмасаў нарадзіўся ў горадзе Таганрог, што ў Растоўскай вобласці Расіі. Яшчэ ў дзяцінстве сям’я Абалмасавых пераехала ў Барысаў. У трынаццацігадовым узросце Аляксей Абалмасаў пачаў сур’ёзна займацца веславаннем на байдарцы. Спартыўную падрыхтоўку атрымліваў у Мінскай абласной спецыялізаванай дзіцяча-юнацкай школе алімпійскага рэзерву і ў Рэспубліканскім цэнтры алімпійскай падрыхтоўкі, трэніраваўся ў Артура Васільевіча Быкава. Дзякуючы сваёй незвычайнай працавітасці заявіў аб сабе як перспектыўным спартсмене яшчэ ў 18 гадоў: у 1998 г. разам з сябрамі па камандзе заваяваў бронзавы медаль юнацкага чэмпіянату свету сярод байдарак-чацвёрак на дыстанцыі 1000 метраў. У 2000 г. выйграў гонкі на байдарцы-двойцы на дыстанцыі 1 км, байдарцы-чацвёрцы на паўкіламетровай і кіламетровай дыстанцыях і атрымаў адразу тры залатых медаля маладзёжнага першынства Еўропы.

Пасля заканчэння вучылішча алімпійскага рэзерву спартсмен трэніраваўся пад кіраўніцтвам Дзмітрыя Міронавіча Гошкі, прадстаўляў добраахвотнае спартыўнае таварыства “Дынама” і ўваходзіў у склад спартыўнай каманды ўнутраных войск Міністэрства ўнутраных спраў Рэспублікі Беларусь. Першы сур’ёзны поспех на дарослых спаборніцтвах не заставіў сябе чакаць: у 2001 г. Аляксей Абалмасаў стаў уладальнікам дзвюх бронзавых узнагарод чэмпіянату Еўропы, якія заваяваў у складзе экіпажа байдаркі-чацвёркі на дыстанцыях 500 і 1000 метраў. Праз год гэты ж экіпаж у складзе Аляксея Абалмасава, Вадзіма Махнёва, Рамана Петрушэнкі і Аляксея Скуркоўскага стаў сярэбраным прызёрам чэмпіянату свету ў паўкіламетровай гонцы байдарак-чацвёрак. У 2004 г. Аляксей Абалмасаў заваяваў срэбра еўрапейскага першынства, што адбылося ў Познані (Польшча) і атрымаў права прадстаўляць Беларусь на ХХVIII летніх Алімпійскіх гульнях у Афінах. Экіпаж у складзе Р. Петрушэнкі, В. Махнёва, Д. Турчына і А. Абалмасава выйшаў у фінал спаборніцтваў у гонках на дыстанцыі ў 1 км, аднак у выніку заняў шостае месца.

Наступны, 2005 год, стаў адным з самых паспяховых у кар’еры Аляксея Абалмасава: разам з партнёрамі ён выйграў чэмпіянат Еўропы, атрымаў залаты і бронзавы медалі чэмпіянату свету. У наступным сезоне спартсмен стаў залатым і сярэбраным прызёрам чэмпіянату Еўропы ў гонках чатырохмесных байдарак на дыстанцыях 200 і 1000 метраў, на чэмпіянаце свету ў Венгрыі заваяваў бронзавы медаль на дыстанцыі 1 км. У 2007 г. Аляксей Абалмасаў разам з сябрамі атрымаў сярэбраныя медалі чэмпіянату Еўропы ў гонцы байдарак-чацвёрак на 200 м, у 2008 г. выйграў бронзу на першынстве Еўропы ў Мілане (Італія) і атрымаў ліцэнзію на XXIX летнія Алімпійскія гульні. Менавіта на Алімпіядзе ў Пекіне экіпаж байдаркі-чацвёркі ў складзе Аляксея Абалмасава, Вадзіма Махнёва, Рамана Петрушэнкі і Артура Літвінчука пад кіраўніцтвам трэнера Нацыянальнай зборнай Беларусі Уладзіміра Уладзіміравіча Шантаровіча заваяваў залаты медаль у гонках на 1000 м.

Пасля трыумфу на Алімпіядзе Аляксей Абалмасаў працягваў выступаць за нацыянальную зборную і прымаў удзел у буйнейшых міжнародных спаброніцтвах па веславанні на байдарках. У 2009 г. спартсмен выйграў золата чэмпіянату Еўропы і стаў чэмпіёнам свету ў сваёй кароннай дысцыпліне – гонках на байдарках-чацвёрках на дыстанцыі 1000 м. У наступным годзе калекцыя ўзнагарод Аляксея Абалмасава папоўнілася сярэбраным медалём чэмпіянату свету. У 2011 г. спартсмен працягваў выступаць на этапах Кубка свету, каб мець магчымасць выступіць на ХХХ летніх Алімпійскіх гульнях у Лондане. Аднак Беларусь не атрымала алімпійскую ліцэнзію на ўдзел нашай байдаркі-чацвёркі ў спаборніцтвах па веславанні. Аляксей Абалмасаў пакінуў вялікі спорт і працягваў службу ва ўнутраных войсках МУС Рэспублікі Беларусь, скончыў Міжнародны гуманітарна-эканамічны інстытут і Беларускі дзяржаўны ўніверсітэт фізічнай культуры. Сёння заслужаны майстар спорту Рэспублікі Беларусь Аляксей Абалмасаў працуе трэнерам і перадае свой вопыт маладым спартсменам. Ён узнагароджаны ордэнам Айчыны ІІІ ступені, з’яўляецца ганаровым грамадзянінам Барысава і Барысаўскага раёна.

Даведка падрыхтавана на аснове матэрыялаў сайта Нацыянальнага алімпійскага камітэта Рэспублікі Беларусь у 2019 г.