Гісторыя прадпрыемства пачалася ў 1873 г., калі ў маёнтку Барань Аршанскага павета (цяпер горад у Аршанскім раёне Віцебскай вобласці) дваранін І. Мянжынскі заснаваў драцяна-цвіковы завод. Завод да пачатку ХХ ст. стаў адным з буйнейшых металаапрацоўчых прадпрыемстваў на тэрыторыі Беларусі, яго прадукцыя выстаўлялася на знакамітым Ніжагародскім кірмашы і прадавалася па ўсёй Раійскай імперыі. У 1918 г. завод нацыяналізаваны, у 1921 г. перайменаваны ў «Чырвоны Кастрычнік». У гады Вялікай Айчыннай вайны яго абсталяванне эвакуіравана ў г. Благавешчанск Башкірскай АССР. Пасля вяртання і аднаўлення працы на прадпрыемстве асвоены выпуск новага віду прадукцыі – бытавой швейнай машыны. З 1952 г. завод пачаў выпуск радыётэхнічных вырабаў, з 1967 г. асвоена вытворчасць гібрыдных мікрасхем. У 1960–1980 гг. на прадпрыемстве адбылася тэхнічная рэканструкцыя, узведзены новыя карпусы, павялічаны аб'ёмы вытворчасці. Прадпрыемства стала адным з буйнейшых вытворцаў сродкаў радыёсувязі ў СССР.

У 1991 г. завод «Чырвоны Кастрычнік» перайменаваны ў дзяржаўную прамысловую фірму «Лёс». У 1997 г. прадпрыемства перайшло ў падпарадкаванне Міністэрства сувязі Рэспублікі Беларусь. Тут быў асвоены выпуск спецыяльнага абсталявання для мантажу і рамонту правадной сеткі, распрацавана і запушчана ў вытворчасць будаўнічая фурнітура, адпаведная еўрапейскаму стандарту. 13 мая 2011 г. прадпрыемства пераўтворана ў адкрытае акцыянернае таварыства. З 2018 г. тут праводзілася рэнавацыя будынкаў, рамонт і мадэрнізацыя цэхаў. Былі створаны новыя вытворчыя ўчасткі, закуплена сучаснае абсталяванне.

У цяперашні час ААТ "Тэхніка сувязі" спецыялізуецца на распрацоўцы і вытворчасці лічбавых і аналагавых сістэм радыёсувязі, тэлекамунікацыйнага абсталявання для правадных ліній сувязі, а таксама аказвае паслугі па вырабе нестандартнага абсталявання і металаапрацоўцы.

Матэрыял падрыхтаваны ў 2024 г.