Беларускі дзяржаўны аграрны тэхнічны ўніверсітэт (БДАТУ) заснаваны ў 1954 г. як Беларускі інстытут механізацыі і электрыфікацыі сельскай гаспадаркі. Асновай для стварэння навучальнай установы паслужыў аддзел механізацыі сельскай гаспадаркі аўтатрактарнага факультэта Беларускага політэхнічнага інстытута. Першапачаткова ў структуры інстытута функцыянавалі кафедры асноў марксізму-ленінізму, фізікі, тэхналогіі металаў, агульнай хіміі, вышэйшай матэматыкі, чарчэння, замежных моў, фізічнага выхавання. У 1956 г. адкрыты аспірантура і завочнае аддзяленне. Паступова ўводзіліся новыя факультэты, пашыраўся пералік спецыяльнасцей. З 1957 па 1992 г. быў вядомы як Беларускі інстытут механізацыі сельскай гаспадаркі. У 1992 г. інстытут атрымаў назву Беларускі аграрны тэхнічны ўніверсітэт, з 2000 г. ‒ Беларускі дзяржаўны аграрны тэхнічны ўніверсітэт.

Цяпер універсітэт з’яўляецца сучасным навуковым цэнтрам у галіне аграпрамысловага комплексу, механізацыі і электрыфікацыі сельскай гаспадаркі, эканомікі сельскагаспадарчай дзейнасці. Адукацыйны працэс ажыццяўляецца на наступных факультэтах: аграмеханічным, аграэнергетычным, тэхнічнага сэрвісу ў аграпрамысловым комплексе, прадпрымальніцтва і кіравання, інжынерна-тэхналагічным, давузаўскай падрыхтоўкі і прафесійнай арыентацыі моладзі. У структуры ўніверсітэта функцыянуюць Цэнтр інавацыйных тэхналогій навучання і кіравання, Цэнтр навукова-метадычнай і вучэбнай работы, навукова-даследчыя лабараторыі і інш. У 2011 г. у БДАТУ створаны Навукова-даследчы інстытут механізацыі и электрыфікацыі сельскай гаспадаркі. У 2013 г. універсітэт узнагароджаны Прэміяй Урада Рэспублікі Беларусь за дасягненні ў галіне якасці. У 2022 г. БДАТУ стаў лаўрэатам Гран-пры Міжнароднай бізнес-прэміі «Лідар года 2022» у намінацыі «Адукацыя».

Матэрыял падрыхтаваны ў 2023 г.