Біялагічны заказнік рэспубліканскага значэння “Лебядзіны” быў створаны ў прыгараднай зоне Мінска ў 1984 г. Мэтай заснавання стала зберажэнне прыбярэжнага фаўністычнага комплексу рэдкіх відаў жывёл і птушак.

Тэрыторыя плошчай 43 га ўяўляе сабой забалочаны і меліяраваны луг з закінутымі тарфянымі кар’ерамі. У цэнтры знаходзіцца аднайменная сажалка плошчай 15 га, якая амаль поўнасцю зарасла трыснягом, рагозам і асакой. У наваколлі маюцца ўчасткі бярэзнікаў і хвойнікаў, асобныя насаджэнні елкі. У флоры налічваецца больш за 300 відаў сасудзістых раслін, сярод якіх шмат лекавых, меданосных і дэкаратыўных. Фаўна прадстаўлена 94 відамі пазваночных жывёл, у тым ліку больш за 60 відамі птушак. Сярод рэдкіх насельнікаў – лебедзь-шыпун, малая паганка, крачка, малы бугай, чарацянка, лысуха, хахлатая чэрнядзь. Жывуць тут таксама некалькі відаў рыб і млекакормячых.

Заказнік з’яўляецца месцам, дзе жыхары Мінска могуць назіраць за жывой прыродай у межах горада. Тут абсталявана экалагічная сцежка, узведзены альтанкі для наведвальнікаў. У цяперашні час ахоўная тэрыторыя знаходзіцца пад пагрозай знікнення з-за моцнага антрапагеннага ўздзеяння.

Матэрыял падрыхтаваны ў 2023 г.