Заказнік-журавіннік “Бабінец” быў створаны ў Акцябрскім раёне Гомельскай вобласці ў 1979 г. Мэтай заснавання стала захаванне ў прыродным стане месцаў росту журавін на тарфяным балоце вярховага тыпу Парослішча. У 2007 г. ахоўная тэрыторыя атрымала статус рэспубліканскага біялагічнага заказніка.

Агульная плошча складае 830,7 га. Рэльеф раўнінны. Асноўная частка балотнага масіву ўкрыта хваёва-сфагнавымі фітацэнозамі. Таксама маюцца бярозавыя гаі, невялікая колькасць ельнікаў і шырокалісцёвых лясоў. Флора налічвае больш за 400 відаў сасудзістых раслін. Зарэгістраваны месцы пасяленняў рэдкіх для Беларусі барсукоў, чорных буслоў, шэрых чапляў.

Заказнік з'яўляецца аб'ектам экалагічнага турызму. Тут абсталявана экалагічная сцежка, маюцца месцы для адпачынку. У вызначаныя тэрміны дазволена паляванне і збор ягад.

Матэрыял падрыхтаваны ў 2023 г.