Гродзенская губернская друкарня на працягу свайго існавання (1820–1915) выдавала афіцыйныя матэрыялы, газету “Гродненские губернские ведомости” (з 1838), “Адрас-каляндар і даведачную кніжку Гродзенскай губерні” (1858–1915), “Памятную кніжку Гродзенскай дырэкцыі народных вучылішчаў” (1890–1906).

За час сваёй дзейнасці друкарня выдала каля 150 назваў кніг і больш за 200 друкаваных адзінак. У Гродне выходзілі працы па гісторыі, краязнаўстве, этнаграфіі, фальклоры Беларусі, мастацкія творы і інш. Быў выдадзены шэраг гістарычных прац, такіх як “Апісанне горада Слоніма” М.Г. Мілакоўскага (1891), “Горад Брэст-Літоўск і яго старажытныя храмы” Л.С. Паеўскага (1894), “Спроба бібліяграфічнага паказальніка артыкулаў і заметак па гісторыі цэркваў і манастыроў Гродзенскай губерні” М. Дзікоўскага (1894), “Гродзенская губерня ў 1812 г.” і “Нарыс гісторыі горада Гродна” Я.Ф. Арлоўскага (абедзве 1912) і інш. Сярод літаратурных твораў вылучаецца паэма “Тарас на Парнасе” (1896), выдадзеная на беларускай мове. Этнаграфічныя выданні Гродзенскай губернскай друкарні прадстаўлены такімі працамі, як “Вопыт збірання песень і казак сялян Паўночна-Заходняга краю” М.А. Дзмітрыева (1868), “Матывы вясельных песень пінчукоў” М.В. Доўнар-Запольскага (1893) і інш. Частка кніжных выданняў прадстаўляе сабой адбіткі з газеты “Гродненские губернские ведомости”.

Губернская друкарня была зачынена ў сувязі з акупацыяй Гродна нямецкімі войскамі ў час Першай сусветнай вайны.

Матэрыял падрыхтаваны ў 2020 г.