Казьянскі паляўнічы заказнік (у цяперашні час рэспубліканскі заказнік “Казьянскі”) быў створаны ў Полацкім і Шумілінскім раёнах Віцебскай вобласці ў 1960 г. Мэтай заснавання стала аднаўленне і падтрыманне аптымальнай колькасці паляўніча-прамысловых відаў жывёл. У 1998 г. заказнік атрымаў міжнародны статус ключавой арніталагічнай тэрыторыі.

Плошча ахоўных зямель, размешчаных на Полацкай нізіне, складае 28,4 тыс. га. Тут працякаюць рэчкі Обаль, Сосніца, Ценіца, Глыбачка, знаходзяцца азёры Мошна, Расалай і Красамай, шмат вярховых балот. У раслінным покрыве ў асноўным хваёвыя і бярозавыя лясы, дзе захаваліся ўчасткі высокабанітэтных насаджэнняў з элітнымі дрэвамі. У межах заказніка зарэгістраваны 583 віды сасудзістых раслін. Шмат лекавых, вялікая разнастайнасць лішайнікаў і мхоў, сустракаюцца віды, занесеныя ў Чырвоную кнігу Рэспублікі Беларусь: баранец звычайны, наперстаўка буйнакветная, тлушчанка звычайная, шпажнік чарапіцавы, касач сібірскі, сфагнум Ліндберга, менегацыя прадзіраўленая, марошка прысадзістая і інш. У лясах водзяцца буры мядзведзь, лось, дзік, бабёр, рысь, казуля, заяц. Заказнік з’яўляецца месцам масавага гнездавання мясцовых і канцэнтрацыі пералётных вадаплаўных птушак (усяго 175 відаў). Тут жыве вялікая колькасць глушца, цецерука, шэрай курапаткі. Адзначана гнездаванне рэдкіх для Беларусі вялікага і сярэдняга кулонаў, вялікага вераценніка, залацістага сяўца, турухтана, дупеля, скапы, беркута, змеяеда, вялікага падворліка і інш.

Па тэрыторыі заказніка пракладзены турыстычны маршрут. Яго лясы з’яўляюцца традыцыйным месцам збору грыбоў і ягад. Адміністрацыйны цэнтр размешчаны ў г.п. Шуміліна.

Матэрыял падрыхтаваны ў 2023 г.