Рэспубліканскі навукова-практычны цэнтр траўматалогіі і артапедыі (РНПЦ траўматалогіі і артапедыі) заснаваны 25 мая 1930 г. у Мінску як Дзяржаўны інстытут фтызіятрыі, артапедыі і неўралогіі. У 1930–1941 гг. супрацоўнікамі інстытута праведзены шэраг важных даследаванняў, вывучаліся праблемы артапедыі і траўматалогіі, дэгенератыўныя працэсы ў касцях і пазваночніку, удасканалены метады правядзення аперацый пры вывіхах пляча. Значны ўклад у навуковую дзейнасць установы ўнеслі заснавальнік артапедычнай школы М. Н. Шапіра і заслужаны дзеяч навукі, лаўрэат Дзяржаўнай прэміі Беларусі Д. А. Маркаў.
У час Вялікай Айчыннай вайны работа інстытута была спынена. У 1944 г. ён пачаў працаваць як Мінскі навукова-даследчы інстытут траўматалогіі і артапедыі Народнага камісарыята аховы здароўя БССР. У 1945 г. атрымаў новую назву – Мінскі навукова-даследчы інстытут артапедыі і аднаўленчай хірургіі. У пасляваенныя гады ў інстытуце ў асноўным распрацоўвалі метады лячэння наступстваў баявых траўм. Паступова інстытут пашыраў межы сваёй дзейнасці, праводзіў навуковую і арганізацыйна-метадычную работу па пытаннях артапедыі і аднаўленчай хірургіі, нейрахірургіі, пратэзавання, сківічна-тварнай хірургіі і траўматалогіі і інш. У 1957 г. перайменаваны ў Навукова-даследчы інстытут траўматалогіі і артапедыі Міністэрства аховы здароўя БССР. У 1961–1980 гг. была значна ўдасканалена матэрыяльна-тэхнічная база, распрацоўваліся метады дыягностыкі і лячэння паталогій апорна-рухальнага апарату, траўм у дарослых і дзяцей. Намаганнямі ўстановы значна пашырылася медыцынская сетка краіны, адкрыты траўматалагічныя аддзяленні ў абласных і раённых бальніцах. У 1981 г. інстытут атрымаў будынак на вуліцы лейтэнанта Кіжаватава. У 2001 г. перайменаваны ў Беларускі навукова-даследчы інстытут траўматалогіі і артапедыі. З 2007 г. працуе як Рэспубліканскі навукова-практычны цэнтр траўматалогіі і артапедыі
Зараз асноўнымі кірункамі дзейнасці цэнтра з’яўляюцца: распрацоўка і ўкараненне новых методык дыягностыкі і лячэння артапедычных паталогій у дзяцей і дарослых, траўм і хвароб апорна-рухальнага апарату, суставаў, пазваночніка і спіннога мозгу; абследаванне, лячэнне пацыентаў у амбулаторных і стацыянарных умовах; правядзенне навукова-даследчай работы і інш. У структуры ўстановы функцыянуюць клінічныя, навуковыя, дыягнастычныя аддзяленні, лабараторыі, Савет па абароне дысертацый (з 1995 г.), аспірантура і дактарантура (з 2000 г.). На базе РНПЦ траўматалогіі і артапедыі адкрыты Рэспубліканскі цэнтр для лячэння хворых з пашкоджаннем пазваночніка і спіннога мозгу і Рэспубліканскі цэнтр спартыўнай траўмы і паталогіі суставаў.
Распрацаваныя супрацоўнікамі цэнтра тэхналогіі карыстаюцца попытам не толькі ў Беларусі, але і за мяжой. РНПЦ траўматалогіі і артапедыі прымае ўдзел у рабоце такіх міжнародных арганізацый, як EFORT (Еўрапейская федэрацыя нацыянальных асацыяцый траўматолагаў-артапедаў), SICOT (Міжнародны кангрэс артапедаў-траўматолагаў), ESSKA (Еўрапейская асацыяцыя хірургіі каленнага сустава, спартыўнай траўмы, артраскапіі), AAOS (Амерыканская акадэмія хірургаў-артапедаў).
Дзейнасць установы адзначана Ганаровымі граматамі Нацыянальнай акадэміі навук Беларусі (2008) і Савета Міністраў Рэспублікі Беларусь (2014).
Матэрыял падрыхтаваны ў 2020 г.