Рэспубліканскае дзяржаўна-грамадскае аб'яднанне «Добраахвотнае таварыства садзейнічання арміі, авіяцыі і флоту» (ДТСААФ) з'яўляецца масавай абаронна-патрыятычнай арганізацыяй Беларусі. На працягу многіх гадоў яно ўносіць вялікі ўклад у ўмацаванне бяспекі дзяржавы.

Гісторыя арганізацыі пачалася 28 лютага 1927 г., калі было створана Таварыства садзейнічання абароне, авіяцыйнаму і хімічнаму будаўніцтву СССР (Асаавіяхім). У 1948 г. яно было раздзелена на тры абаронныя таварыствы: Дабрачыннае таварыства садзейнічання арміі (ДТСАРМ), авіяцыі (ДТСАВ), флоту (ДТСФЛОТ). У 1951 г. яны былі аб'яднаны ў Дабрачыннае таварыства садзейнічання арміі, авіяцыі і флоту (ДТСААФ) СССР. Сучасная гісторыя арганізацыі пачалася з 1991 г., калі яно было пераўтворана ў Беларускае абароннае спартыўна-тэхнічнае таварыства (БелАСТТ). З 2003 г. мае сучасную назву.

У структуру ДТСААФ уваходзяць цэнтральны савет, цэнтральная рэвізійная камісія, прэзідыум цэнтральнага савета, рэспубліканскі дом ДТСААФ, абласныя арганізацыйныя структуры і арганізацыі цэнтральнага падпарадкавання. Вышэйшым кіруючым органам ДТСААФ з'яўляецца з'езд (склікаецца не радзей аднаго разу ў пяць гадоў). Цэнтральны савет – орган кіравання, які выбіраецца з'ездам і ажыццяўляе кіраўніцтва дзейнасцю ДТСААФ у перыяд паміж з'ездамі. Кіраўніком з'яўляецца генерал-маёр запаса І. В. Дырман. У 2003 г. прыняты устаў ДТСААФ, зацверджаны эмблема і флаг. У ДТСААФ уваходзяць 135 тыс. членаў. Ажыццяўляюцца ўзаемаадносіны з Міністэрствам абароны Рэспублікі Беларусь, адміністрацыямі гарадоў і раёнаў краіны, вучэбнымі ўстановамі, ваеннымі камісарыятамі, воінскімі часцямі, Беларускім саюзам афіцэраў, Беларускім рэспубліканскім саюзам моладзі і многімі іншымі грамадскімі арганізацыямі і аб'яднаннямі. Працуе прэс-цэнтр ДТСААФ (з 2004 г.). Арганізацыя актыўна супрацоўнічае з Міжнародным саюзам ДТСААФ СНД. У Маскве ў 2014 г. створаны сумесны прэзідыум ДТСААФ Беларусі і Расіі.

Асноўнымі задачамі ДТСААФ з'яўляюцца ваенна-патрыятычнае выхаванне моладзі, падрыхтоўка да воінскай службы і працоўнай дзейнасці, навучанне спецыялістаў для Узброеных Сіл, іншых войск і воінскіх фарміраванняў, падрыхтоўка кадраў масавых тэхнічных прафесій, развіццё тэхнічных, авіяцыйных і ваенна-прыкладных відаў спорту і інш. Таварыства рыхтуе шафёраў аўтобусаў, грузавых і легкавых машын. З 2006 г. пачалася падрыхтоўка спецыялістаў для войск сувязі. У складзе арганізацыі шэсць аэраклубаў. Паспяхова дзейнічаюць пяць спецыялізаваных дзіцяча-юнацкіх спартыўна-тэхнічных школ ДТСААФ: па аўта- і мотаспорце, водных відах спорту, стралковым спорце і радыёспорце. У іх пастаянна займаецца каля 1300 навучэнцаў, праводзіцца падрыхтоўка спартыўнага рэзерву для папаўнення нацыянальных і зборных каманд Рэспублікі Беларусь. ДТСААФ пастаянна ўдасканальвае матэрыяльна-тэхнічную базу. Створана і паспяхова дзейнічае сістэма падрыхтоўкі кадраў, кіравання і кантролю за вучэбна-вытворчай дзейнасцю. Працуюць два вучэбныя цэнтры павышэння кваліфікацыі кіруючых работнікаў і спецыялістаў ДТСААФ у Мінску і Брэсце.

Арганізацыяй праводзяцца рэспубліканскія спаборніцтвы па тэхнічных і авіяцыйных відах спорту. Спартсмены ДТСААФ прымаюць удзел у міжнародных спаборніцтвах, чэмпіянатах, Кубках свету і Еўропы. Праходзяць дні ДТСААФ; міжнародныя, абласныя і раённыя аўтамабільныя аўтапрабегі; месячнікі абаронна-патрыятычнай і спартыўнай работы, прысвечаныя Дню абаронцаў Айчыны і Узброеных Сіл Рэспублікі Беларусь, Дню Перамогі; рэспубліканскія фестывалі-конкурсы, выстаўкі і інш.

Арганізацыя мае шмат высокіх узнагарод: ордэн Чырвонага Сцяга (1947), знак «За актыўную працу» (1958), ордэн Леніна (1977), Ганаровую грамату Вярхоўнага Савета БССР (1977), юбілейны Ганаровы знак ДТСААФ СССР (1977). Многія выхаванцы таварыства ў гады Вялікай Айчыннай вайны мужна змагаліся за свабоду і незалежнасць краіны. Актыўна працуюць Народны музей гісторыі ДТСААФ і Музей авіяцыйнай тэхнікі Мінскага аэраклуба ДТСААФ. Выдаецца інфармацыйны бюлетэнь «Вестник ДОСААФ». Быў выпушчаны дакументальны фільм «ДТСААФ Республікі Беларусь».

Матэрыял падрыхтаваны ў 2018 г.