Беларускі дзяржаўны архіў кінафотафонадакументаў (БДАКФФД) – адзінае ў Беларусі дзяржаўнае сховішча візуальных дакументальных помнікаў. Створаны ў маі 1941 г. у Мінску паводле пастановы Савета Народных Камісараў СССР ад 29.03.1941 г., ён стаў навукова-даследчай установай, што займаецца камплектаваннем, улікам, захаваннем і арганізацыяй выкарыстання аўдыёвізуальных дакументаў. Дзейнасць архіва пачалася ў лістападзе 1943 г. У той час яго штат налічваў пяць чалавек. Свайго памяшкання не было, і ўсе дакументы захоўваліся ў адной шафе, што знаходзілася ў актасховішчы Дзяржаўнага архіва Мінскай вобласці. У кастрычніку 1949 г. архіву быў перададзены будынак царквы-капліцы Святой Марыі Магдаліны на закрытых Старажоўскіх могілках у Мінску. З 1963 г. cтаў называцца Цэнтральны дзяржаўны архіў кінафотафонадакументаў, з 1993 г. сучасная назва.

У фондах архіва знаходзяцца 42 930 адзінкі захоўвання кінадакументаў, 262 958 адзінак захоўвання фотадакументаў, 20 579 адзінак захоўвання фонадакументаў і 5 750 адзінак захоўвання відэадакументаў. БДАКФФД таксама з’яўляецца захавальнікам 27 млн аўдыёвізуальных дакументаў усіх дзяржаўных архіваў, перанесеных на мікраплёнку (70% ад агульнага дакументальнага масіву краіны). Гэта так званы страхавы фонд, па якім можна будзе аднавіць інфармацыю, калі арыгіналы дакументаў будуць пашкоджаны ці страчаны. Архіў пастаянна папаўняецца дакументамі. У яго фондах захоўваюцца рарытэтныя аўдыёвізуальныя дакументы: фотаздымкі рабочых, якія працавалі на будаўніцтве Маскоўска-Брэсцкай чыгункі ў 1870 г.; запуску паветранага шара ў Губернатарскім садзе Мінска (цяпер Цэнтральны дзіцячы парк імя М. Горкага) у 1898 г.; кінадакументы, на якіх адлюстраваны парад войскаў ў Бабруйску ў прысутнасці цара Мікалая ІІ у 1916 г.; грампласцінка 1902 г. з запісам оперы “Кармен” і інш.

Апошнім набыткам БДАКФФД стаў арыгінал фотаальбома з краявідамі Магілёва і падзеямі Першай сусветнай вайны. Набыта таксама другая частка фотакалекцыі В. І Аркашова “Моя война” — 300 здымкаў, якія адлюстроўваюць эпізоды Вялікай Айчыннай вайны. Першая частка калекцыі (508 фатаграфій) таксама знаходзіцца ў фондах архіва. Вялікую каштоўнасць маюць калекцыі фотаздымкаў і фотапаштовак (больш за 400 адзінак) беларускіх гарадоў дарэвалюцыйнага часу — Мінска, Нясвіжа, Барысава, Гомеля, Віцебска, Полацка, Магілёва і іншых; фотаздымкі князёў Радзівілаў (55 адзінак); трафейныя фотаальбомы, вывезеныя з Германіі ў 1945 г. (63 экземпляра); серыя “Сусветнае фота” (жанравыя фотаздымкі, зробленыя замежнымі фотамастакамі, а таксама партрэты Б. Шоу, Ф. Шаляпіна, Р. Тагора, Ч. Чапліна, І. Штрауса і інш).

Фонд кінадакументаў прадстаўлены мастацкімі, мультыплікацыйнымі, дакументальнымі, навукова-папулярнымі, вучэбнымі фільмамі, знятымі на тэрыторыі Беларусі. Сярод іх — дарэвалюцыйная кінахроніка, дакументальныя фільмы і кіназамалёўкі міжваенных часоў, ваенная, партызанская, трафейная кінахроніка 1941—1944 гг., кінадакументалістыка, у тым ліку кіначасопісы “Савецкая Беларусь”, “Навіны дня”, “Піянер Беларусі”, “Мастацтва Беларусі”, “Навука і тэхніка”, “Сельская гаспадарка Беларусі”.

Захоўваюцца фоназапісы інтэрв’ю і выступленняў вядомых палітыкаў, навукоўцаў, дзячаў культуры і мастацтва Беларусі (Я. Купалы, Я. Коласа, М. Танка, К. Крапівы, А. Бембеля, З. Азгура, С. Станюты, Ц.Я. Кісялёва, П.М. Машэрава і інш), музычных і драматычных твораў, успамінаў удзельнікаў Вялікай Айчыннай вайны. Сярод фонадакументаў найбольш значнай з’яўляецца калекцыя грамафонных пласцінак і магнітафонных запісаў вядомага беларускага тэнара М.І. Забейды-Суміцкага з песнямі, рамансамі, арыямі з опер на беларускай, чэшскай, украінскай, польскай, нямецкай, італьянскай, фінскай і англійскай мовах. Калекцыя налічвае 40 адзінак захоўвання.

Асноўнымі крыніцамі камплектавання архіва выступаюць кінастудыя “Беларусьфільм”, Нацыянальная дзяржаўная тэлерадыёкампанія Рэспублікі Беларусь, фотатэкі рэдакцый рэспубліканскіх газет і часопісаў.

Матэрыялы архіва выкарыстоўваюцца ў такіх вядомых тэлеперадачах, як “Контуры”, “Обратный отсчет” на тэлеканале АНТ і іншых; пры здымках мастацкіх і дакументальных фільмаў. Аўдыёвізуальныя дакументы архіва таксама прадастаўляюцца па запытах замежных грамадзян і арганізацый.

У архіве вядзецца работа па пераводзе ўсіх фондаў ў лічбавы фармат. На цяперашні момант ужо пераведзена 90% фотадакументаў і 70% фонадакументаў. На сайце архіваў Беларусі размешчана старонка ББДАКФФД, ствараецца ўласны сайт установы.

Апошнія сямнаццаць гадоў установу ўзначальвае В.В. Баландзін. Архіў мае 6 аддзелаў, 3 лабараторыі, 8 сховішчаў, навукова-даведачную бібліятэку.

Матэрыял падрыхтаваны Дзяржынскай цэнтральнай раённай бібліятэкай у 2016 г.