Біялагічны заказнік “Буда-Кашалёўскі” быў створаны на тэрыторыі Буда-Кашалёўскага раёна Гомельскай вобласці ў 1988 г. Мэтай заснавання стала зберажэнне каштоўных фрагментаў дуброў, у якіх асобныя дрэвы ўзростам больш за 100 гадоў маюць статус помнікаў прыроды. У 2007 г. заказнік атрымаў статус рэспубліканскага.

Ахоўная тэрыторыя размешчана на Прыдняпроўскай нізіне. Большая яе частка пакрыта маладым лесам, у якім пераважаюць хвойнікі з дамешкам дуба, бярозы, асіны. Месцамі забалочаныя паніжэнні заняты чорнаальховымі насаджэннямі. У складзе расліннага свету зарэгістравана больш за 500 відаў сасудзістых раслін. Сярод рэдкіх відаў адзначаны арніка горная, фіялка балотная, цыбуля гусіная, святаяннік горны, лабарыя лёгачная і інш. На тэрыторыі прыроднага комплексу даволі высокая колькасць дзікоў, казуль і лісіц. Сустракаюцца рэдкія для Беларусі барсукі, балотныя чарапахі, чорныя буслы, беласпінныя дзятлы і інш.

Заказнік з'яўляецца аб'ектам экалагічнага турызму. Тут абсталявана экалагічная сцежка, пракладзены пешыя і веласіпедныя турыстычныя маршруты. У вызначаныя тэрміны дазволена паляванне на дзіка, казулю, лісіцу, янотападобнага сабаку.

Матэрыял падрыхтаваны ў 2023 г.