ААТ «Гамма вкуса» – вытворчы комплекс, які спецыялізуецца на вырабе дзіцячага харчавання, сокаў, кансерваў, соусаў, варэння, пюрэ-паўфабрыкатаў з гародніны і садавіны.

Гісторыя прадпрыемства пачалася ў 1896 г., калі ў маёнтку князя Радзівіла ў в. Радзівілімонты Слуцкага павета (цяпер в. Чырвоная Зорка Клецкага раёна Мінскай вобласці) пачала дзейнічаць невялікая фабрыка па вытворчасці патакі, крухмалу, спірту, павідла і агуркоў.

Пасля Вялікай Айчыннай вайны прадпрыемства пайшло па шляху інтэнсіфікацыі вытворчасці, тэхнічнага абнаўлення, асваення новых тэхналогій. У 1953 г. была праведзена тэхнічная рэканструкцыя, што дазволіла вырабляць каля 50 найменняў кансерваў з гародніны, пладоў і ягад. У верасні 1953 г. камбінат атрымаў назву «Клецкі кансервавы завод “Чырвоная Зорка”» з вытворчай магутнасцю 3 млн умоўных слоікаў у год. У 1961 г. пачалося будаўніцтва новага кансервавага завода ў Клецку з праектнай магутнасцю 28 млн умоўных слоікаў у год, у тым ліку 10 млн з іх прызначаліся для дзіцячага харчавання. У жніўні 1974 г. быў уведзены ў эксплуатацыю цэх па вытворчасці агульных кансерваў, у лістападзе 1975 г. – цэх па вытворчасці кансерваў для дзяцей. У 1976 г. адбылося аб’яднанне Клецкіх кансервавага і вінаробнага заводаў і Капыльскага харчовага камбіната. У выніку было створана новае прадпрыемства – Клецкі кансервава-вінаробны завод.

Рэспубліканскае ўнітарнае вытворчае прадпрыемства (РУВП) «Клецкі кансервавы завод» створана рашэннем Мінскага абласнога выканаўчага камітэта ад 16 снежня 1996 г. У сакавіку 2010 г. прадпрыемства было пераўтворана ў ААТ «Гамма вкуса».

«Гамма вкуса» ўваходзіць у склад Беларускага дзяржаўнага канцэрна харчовай прамысловасці «Белдзяржхарчпрам» і з’яўляецца найбуйнейшым у Беларусі вытворцам сокаў і кансерваў для дзіцячага харчавання. За апошнія гады была праведзена вялікая работа па ўдасканаленні тэхналогіі вытворчасці, асваенні новай тэхнікі, паляпшэнні арганізацыі працы. Асартымент прадукцыі налічвае больш за 300 найменняў, дзейнічае 10 тэхналагічных ліній, сістэма пад’ёмнікаў для кантэйнернай перавозкі сыравіны і адгрузкі гатовай прадукцыі. Для вытворчасці выкарыстоўваецца толькі натуральная, экалагічна чыстая сыравіна, увесь працэс перапрацоўкі якой ажыццяўляецца непасрэдна на прадпрыемстве, што дазваляе дасягаць высокай якасці прадукцыі.

Матэрыял падрыхтаваны ў 2023 г.