Вытворчае ўнітарнае прадпрыемства «Папяровая фабрыка» Дэпартамента дзяржаўных знакаў Міністэрства фінансаў Рэспублікі Беларусь (скарочаная назва УП «Папяровая фабрыка» Дзяржзнака) заснавана ў 1902 г. на тэрыторыі ляснога масіву (уладальнік – памешчык І.Х. Каладзееў). У красавіку 1901 г. гэтыя землі набыў мінскі купец О.Х. Чорны, які займаўся рэалізацыяй лесу. У кастрычніку 1902 г. абгортачна-папяровая фабрыка «Папірус» О. Чорнага пачала сваю дзейнасць.

У 1910 г. на фабрыцы працавала каля ста чалавек. На той час яна з'яўлялася буйнейшым у краіне прадпрыемствам па вырабе паперы. У гады Першай сусветнай і грамадзянскай войнаў фабрыка моцна пацярпела, адноўлена ў 1920 г. З 1922 г. атрымала назву «Прафінтэрн», была ўзбуйнена і мадэрнізавана, вырабляла абгортачную і шпалерную паперу. У перыяд Вялікай Айчыннай вайны працавала з вялікімі перапынкамі. 28 чэрвеня 1944 г. вытворчыя карпусы фабрыкі былі падарваны немцамі. 3 кастрычніка 1944 г. пачалося аднаўленне прадпрыемства. З 1971 г. знаходзілася ў складзе Барысаўскага папярова-лесахімічнага завода. Як асобнае прадпрыемства фабрыка пачала сваё існаванне ў 1992 г. і была перададзена ў ведамства Камітэта Дзяржаўных знакаў пры Савеце Міністраў Рэспублікі Беларусь. Асноўнымі накірункамі дзейнасці сталі распрацоўка тэхналогіі дакументнай паперы і стварэнне паліграфічнай вытворчасці. Першая партыя паперы з вадзянымі знакамі і рознымі ступенямі абароны (для выпуску лісткоў непрацаздольнасці, чэкаў «Маёмасць», працоўных і ашчадных кніжак, праязных білетаў, талонаў і г.д.) была выпушчана восенню 1992 г. У 1993 г. па прапанове літоўскай фірмы створана сумеснае беларуска-літоўскае прадпрыемства «БМВ-Папірус» (ліквідавана ў 1996).

1 ліпеня 2000 г. фабрыка перайменавана ва ўнітарнае прадпрыемства «Барысаўская папяровая фабрыка» Дзяржзнака. Прадпрыемства пачало выпуск паліграфічнай прадукцыі. Сёння ў вытворчасці выкарыстоўваюцца сучасныя тэхналогіі і высокатэхналагічнае абсталяванне. З 2005 г. на прадпрыемстве дзейнічае сістэма менеджменту якасці на адпаведнасць патрабаванням СТБ ISO-9001. Прадпрыемства выпускае больш за 200 відаў прадукцыі: бланкі строгай справаздачнасці, каштоўныя паперы з рознымі ступенямі абароны, паперу для шматкаляровага друку, канверты і пакеты, канцылярскія тавары. Фабрыка амаль поўнасцю забяспечвае патрэбы Рэспублікі Беларусь у дакументнай паперы (за выключэннем паперы для банкнот, пашпартоў і некаторых іншых асабліва складаных бланкаў строгай справаздачнасці). Аб'ём вытворчасці прадпрыемства штогод павялічваецца, прадукцыя экспартуецца ў Расійскую Федэрацыю, Украіну, Казахстан і Літву.

Матэрыял падрыхтаваны Мінскай абласной бібліятэкай імя А.С. Пушкіна ў 2013 г.