За гады свайго існавання Беларускі дзяржаўны ўніверсітэт фізічнай культуры (БДУФК) перажыў шмат рэформ і рэарганізацый, заслужыў аўтарытэт не толькі ў нашай краіне, але і за мяжой. Ён рыхтуе выкладчыкаў фізічнай культуры, трэнераў па розных відах спорту, спецыялістаў па дашкольным фізічным выхаванні, фізкультурна-аздараўленчай рабоце, фізічнай рэабілітацыі, менеджараў спорту і турызму. Студэнты і выпускнікі навучальнай установы заўсёды дастойна прадстаўляюць Беларусь на прэстыжных спаборніцтвах самага высокага ўзроўню. Заслужаныя высокія ўзнагароды спартсменаў – вынік сур’ёзнай і адказнай працы прафесарска-выкладчыцкага складу ўніверсітэта.

Заснаваны БДУФК як Інстытут фізкультуры БССР у 1937 г. у Мінску на базе Мінскага тэхнікума фізічнай культуры (1929). З 1992 г. – Акадэмія фізічнага выхавання і спорту Рэспублікі Беларусь, з 2001 г. – Беларуская дзяржаўная акадэмія фізічнай культуры, з 2003 г. – сучасная назва. У першыя гады дзейнасці навучальнай установы лекцыі, практычныя заняткі, усе фізкультурна-масавыя і спартыўныя мерапрыемствы мелі патрыятычную і ваенна-прыкладную накіраванасць. З мэтай больш шырокага прыцягнення моладзі да заняткаў фізічнай культурай і абароннымі відамі спорту студэнты інстытута прапагандавалі і ўкаранялі ў калектыве і рэспубліцы такія формы мабілізацыйнай гатоўнасці, як пешыя пераходы, лыжныя кросы, ваенізаваныя эстафеты, штыкавы бой і інш. Удасканаленню вучэбна-выхаваўчай і спартыўнай працы спрыяла дзейнасць у інстытуце агульнатэарэтычных і спецыялізаваных кафедраў: тэорыі і методыкі фізічнага выхавання, ваеннай падрыхтоўкі, фізіялогіі і хіміі, анатоміі, лячэбнай фізічнай культуры, плавання, спартыўных гульняў і інш. Важнае значэнне для арганізацыі навучальнага і спартыўна-трэніровачнага працэсу мела стварэнне матэрыяльна-тэхнічнай базы, будаўніцтва спартыўных пляцовак і стадыёна. Першы выпуск адбыўся ў 1939 г.

У гады Вялікай Айчыннай вайны выкладчыкі і студэнты ўстановы актыўна ўключыліся ў барацьбу з ворагам. Многія з іх змагаліся на фронце, у падполлі, партызанскіх злучэннях, у тыле. За праяўленую мужнасць былі ўзнагароджаны ордэнамі і медалямі. Планавыя, сістэматычныя заняткі ў інстытуце пачаліся ў лютым 1945 г. Увесь вольны ад вучобы і трэніровак час студэнты разам з выкладчыкамі працавалі над аднаўленнем стадыёна, спартыўных пляцовак, добраўпарадкаванні тэрыторыі інстытуцкага гарадка. Уласнымі намаганнямі былі пабудаваны лыжная база, інтэрнат, абсталяваны кабінеты кафедраў. У 1946 г. утвораны спартыўны клуб інстытута фізкультуры (СКІФ). Сёння гэта мабільнае структурнае падраздзяленне ўніверсітэта, якое каардынуе спартыўна-масавую работу. Вялікае значэнне надавалася падрыхтоўцы і ўдзелу студэнтаў у спартакіядах вышэйшых навучальных устаноў, усесаюзных гульнях, міжнародных універсіядах і іншых афіцыйных спаборніцтвах. У 1958 г. на базе інстытута адкрылася Рэспубліканская школа трэнераў, слухачамі якой сталі вядучыя спартсмены рэспублікі. Ужо ў 1960-я гг. былі дасягнуты вялікія вынікі ў выхаванні спартсменаў высокага класа. Навучэнцы БДУФК выступалі на самых значных спартыўных форумах міру – Алімпійскіх гульнях. З 1952 г. лепшыя спартсмены ўваходзілі ў склад усіх зборных каманд СССР.

22 сакавіка 1991 г. створаны Нацыянальны алімпійскі камітэт Рэспублікі Беларусь (НАК РБ), у склад якога ўвайшлі і супрацоўнікі інстытута. На 101-й сесіі Міжнароднага алімпійскага камітэта, якая адбылася 21–24 верасня 1993 г. у Манака, НАК РБ атрымаў афіцыйнае прызнанне. Яго місіяй стала развіццё алімпійскага руху ў краіне ў адпаведнасці з Алімпійскай хартыяй. Імёны А. Мядзведзя, В. Сідзяка, А. Бяловай, У. Парфяновіча, В. Шчэрбы, С. Багінскай, Н. Цылінскай, М. Лобач, К. Карстэн, Я. Карольчык, Э. Зверавай, А. Грышына, Д. Дашчынскага і іншых беларускіх спартсменаў вядомыя ва ўсім свеце. У іх гонар неаднаразова гучаў гімн краіны і ўзнімаўся беларускі сцяг. За выдатную працу многім выпускнікам прысвоены ганаровыя званні заслужанага трэнера Беларусі і СССР, заслужанага дзеяча фізічнай культуры Беларусі.

Адна з важных частак шматграннай дзейнасці ўстановы – навукова-даследчая праца, найбольш значныя поспехі ў якой былі дасягнуты ў 1970–1980-я гг. У 1964 г. была створана праблемная навукова-даследчая лабараторыя (у 1995 г. рэарганізавана ў Навукова-даследчы інстытут фізічнай культуры і спорту Рэспублікі Беларусь). У 1966 г. адкрыта аспірантура. Для забеспячэння навучальнага працэсу і правядзення навукова-даследчай працы ўніверсітэт мае аўдыторыі, спецыяльныя лабараторыі і класы, аснашчаныя сучаснымі тэхнічнымі сродкамі навучання і неабходным абсталяваннем. У ВНУ атрымалі развіццё дзевяць навукова-педагагічных школ пад кіраўніцтвам вядучых вучоных Беларусі ў галіне спартыўнай навукі (М. Я. Кобрынскага, А. А. Гужалоўскага, У. М. Кража, Т. П. Юшкевіча, А. Р. Фурманава, В. І. Рудніцкага і інш.). У 2004 г. створаны Савет маладых вучоных, які актыўна ўдзельнічае ў канферэнцыях, супрацоўнічае з маладымі навукоўцамі НАН Беларусі і інш. З 2000 г. працуе дактарантура, з 2001 г. – магістратура. Удасканаленню навукова-метадычнай работы ва ўніверсітэце спрыяе прыёмны цэнтр спутнікавага і эфірнага тэлебачання (2010). Больш за 1000 тэлевізійных праграм даюць выкладчыкам універсітэта і спецыялістам у галіне фізічнай культуры і спорту магчымасць адбору і метадычнай перапрацоўкі неабходнага матэрыялу, стварэння фільмаў з мэтай выкарыстання іх у навучальным і вучэбна-трэніровачным працэсах.

З мэтай інтэграцыі ВНУ у сусветную адукацыйную прастору ў 1999 г. створаны аддзел міжнародных сувязяў. Ажыццяўляецца супрацоўніцтва з вядучымі спартыўнымі ўстановамі Расіі, Украіны, Польшчы, Балгарыі, Турцыі, Швецыі, Германіі, Кітая і іншых краін. Выкладчыкі ўніверсітэта выязджаюць за мяжу з мэтай абмену вопытам, удзелу ў міжнародных спартыўных канферэнцыях, сімпозіумах, семінарах, распрацоўкі новых навучальных курсаў і праграм. Важнае значэнне ў міжнароднай дзейнасці ўстановы адводзіцца рабоце па падрыхтоўцы нацыянальных кадраў у галіне адукацыі для замежных краін. З кожным годам павялічваецца і колькасць замежных навучэнцаў у БДУФК.

У структуру ўніверсітэта ўваходзяць Інстытут турызму, Інстытут павышэння кваліфікацыі і перападрыхтоўкі кіраўнікоў і спецыялістаў фізічнага выхавання, спорту і турызму, Вучэбны цэнтр падрыхтоўкі, павышэння кваліфікацыі і перападрыхтоўкі кадраў “Вышэйшая школа трэнераў”, Цэнтр спартыўнай інфармацыі і прапаганды спорту. Вучэбна-выхаваўчы працэс забяспечваюць каля 900 чалавек, у тым ліку прафесарска-выкладчыцкі склад – каля 400 чалавек, сярод якіх дактары навук, прафесары, кандыдаты навук, дацэнты. Кіраўнікамі ВНУ з’яўляліся М. І. Скупаў (з 1937 г.), В. В. Лявонцьеў (з 1938), С. П. Сарычаў (з 1945 г.), М. М. Калюнаў (з 1949 г.), Л. І. Жарыкаў (з 1962 г.), К. А. Кулінковіч (з 1970), А. А. Сёмкін (з 1977), В. А. Сакалоў (з 1985), А. І. Бондар (з 1995). З 1999 г. універсітэт узначальвае М. Я. Кобрынскі. Працуюць Навуковая бібліятэка па фізічнай культуры і спорце, студэнцкі тэатр “StART”, вакальная студыя “Элегія” і інш. Універсітэт выдае зборнік навуковых прац БДУФК “Ученые записки”, які з 2004 г. уваходзіць у “Пералік навуковых выданняў Рэспублікі Беларусь для апублікавання вынікаў дысертацыйных даследаванняў”, зацверджаны ВАК Рэспублікі Беларусь, навукова-тэарэтычны часопіс “Мир спорта”, газету “Трибуна”. З 1993 г. дзейнічае гісторыка-этнаграфічны музей. Ініцыятарам і выканаўцам гэтай задумы стаў дацэнт кафедры філасофіі і гісторыі, кандыдат гістарычных навук С. А. Мышапуд. У 2002 г. адбылося адкрыццё абноўленага музея гісторыі БДУФК. Экспазіцыя распавядае аб асноўных этапах дзейнасці ўніверсітэта па дзесяцігоддзям, пачынаючы з 1929 г.

Спартыўная база ўніверсітэта складаецца з дзевяці крытых спартыўных залаў, сямі адкрытых спартыўных пляцовак, вучэбна-аздараўленчага лагера “Чайка” на беразе возера Дрывяты на Браслаўшчыне. Некаторыя кафедры стварылі свае філіялы: у Ратамцы, на базе цэнтра конегадоўлі, функцыянуе філіял кафедры веласіпеднага, канькабежнага і коннага спорту; у Лагойску – філіял кафедры лыжнага і стралковага спорту; на базе САК “Алімпійскі” размясцілася кафедра плавання.

У рамках статуса асноўнага навукова-педагагічнага цэнтра фізкультурна-спартыўнай адукацыі БДУФК працягвае ажыццяўляць шматузроўневую падрыхтоўку, перападрыхтоўку і павышэнне кваліфікацыі спецыялістаў, актыўна праводзіць фундаментальныя і прыкладныя даследаванні па праблемах алімпійскага і масавага спорту, аздараўленчай фізічнай культуры, турызму. Выкладчыкі і студэнты шануюць гісторыю і традыцыі свайго ўніверсітэта, ганарацца яго высокімі дасягненнямі, імкнуцца да новых вяршынь.

Матэрыял падрыхтаваны ў 2012 г.