Біялагічны заказнік рэспубліканскага значэння “Веткаўскі” быў створаны на тэрыторыі Веткаўскага раёна Гомельскай вобласці ў 1978 г. Мэтай заснавання стала зберажэнне і арганізацыя рацыянальнай нарыхтоўкі дзікарослых лекавых раслін.

Заказнік займаў лясны масіў плошчай 5,9 тыс. га вакол рэк Сож і Беседзь. У раслінным покрыве пераважалі маладыя чарнічныя і імшыстыя хвойнікі, зрэдку трапляліся дубровы, бярэзнікі і невялікія ельнікі. Лес багаты на чабор, цмен пясчаны, палын горкі, ландыш майскі, крапіву двухдомную, чарніцы і інш.

Заказнік быў ліквідаваны ў 2007 г. (пастанова Савета Міністраў Рэспублікі Беларусь ад 27.12.2007 г. № 1833). У 2012 г. ахоўны статус адноўлены ў выглядзе біялагічнага заказніка мясцовага значэння “Веткаўскі” (рашэнне Веткаўскага раённага выканаўчага камітэта ад 29.11.2012 г. №1112). Часткова тэрыторыя радыеактыўна забруджана. На ёй усталяваны кантрольна-прапускны рэжым, турыстычная і аздараўленчая дзейнасць не ажыццяўляецца.

Матэрыял падрыхтаваны ў 2023 г.