Касцюковіцкі краязнаўчы музей першапачаткова існаваў як музей баявой славы на грамадскіх пачатках. Заснавальнікам яго быў настаўнік гісторыі У.Р. Ламінскі. Згодна з загадам упраўлення культуры Магілёўскага аблвыканкама ад 18 чэрвеня 1973 г. і рашэннем Міністэрства культуры БССР ад 1 ліпеня 1973 г. музею нададзены статус дзяржаўнага. Для наведвальнікаў ён быў адкрыты 23 лютага 1975 г. Да 1990 г. размяшчаўся ў драўляным, потым у спецыяльна ўзведзеным будынку. Мае тры экспазіцыйныя залы. Яго асноўны фонд налічвае 14 217 адзінак захоўвання, навукова-дапаможны – 6 374 адзінак. Плошча эскпазіцыйных памяшканняў – 188,2 кв. м., выставачнай залы – 54 кв. м., карціннай галерэі – 80,6 кв. м.

Фонд музея прадстаўлены калекцыямі археалагічных знаходак (сярод іх – прылады працы ІІІ – І тыс. да н.э., косці шарсцістага насарога, зуб маманта), старадрукаў (мінеі 1754 і 1799), нумізматыкі (ХVІІ – ХХ стст., больш за 1 373 манеты рознай вартасці); дакументаў, фотаздымкаў, прадметаў побыту, жывапісу, графікі, скульптуры, дэкаратыўна-прыкладнога мастацтва, баністыкі, узбраення, музычных інструментаў, дакументаў і асабістых рэчаў удзельнікаў Вялікай Айчыннай вайны, народнага паэта Беларусі А. Куляшова, пісьменнікаў В. Хомчанкі, І. Чыгрынава, А. Русецкага, А. Твардоўскага, А. Фадзеева, творы жывапісу А. Бархаткова.

У музеі дзейнічаюць дзве экспазіцыі: “Прырода” (1999) і “Гісторыя”(2008). Першая мае раздзелы: паходжанне Зямлі; развіццё жыцця на Зямлі; геалогія; флора і фаўна раёна; ахова прыроды; геамарфалогія. У зале “Гісторыя” размешчаны экспанаты наступных раздзелаў: археалогія і старажытная гісторыя; гісторыя сярэдніх вякоў; край у складзе Магілёўскай губерні; этнаграфія і побыт; рэлігія; адукацыя; рэвалюцыйны рух і ўстанаўленне савецкай улады; войны на тэрыторыі раёна; сацыяльна-эканамічнае развіццё раёна; чарнобыльская трагедыя; знакамітыя землякі; духоўная спадчына. Музей мае філіял – Літаратурны музей А. Куляшова ў в. Новыя Саматэвічы (цяпер аграгарадок) Касцюковіцкага раёна.

З 1992 г. у музеі працуе выставачная зала, з 1993 г. – карцінная галерэя. На базе музея створаны грамадска-палітычны цэнтр, у якім сумесна з маладзёжнымі арганізацыямі праводзяцца семінары, нарады, інтэлектульныя гульні, творчыя вечарыны. Асноўным напрамкам работы музея з’яўляецца экспазіцыйная дзейнасць,  праводзіцца разнапланавая выставачная, навукова-даследчая і фондавая работа, арганізоўваюцца аглядныя і тэматычныя экскурсіі, музейныя заняткі, іншыя мерапрыемствы.

Найбольш значнымі праектамі музея апошніх гадоў сталі: стварэнне электроннага банка даных кнігі “Памяць” Касцюковіцкага раёна, падрыхтоўка дадатковых спісаў загінуўшых у гады Вялікай Айчыннай вайны жыхароў Касцюкоўшчыны з мэтай увекавечання іх памяці на мемарыяле (2010), падрыхтоўка экспазіцыі “Сялянскае падвор’е Касцюкоўшчыны пачатку ХХ ст.” (2012). У кастрычніку 2012 г. музей прымаў удзел у Першым нацыянальным форуме “Музеі Беларусі”, які праводзіўся ў Гродне.

Матэрыял падрыхтаваны ў 2013 г.