Азёрны (з 2007 г. – гідралагічны) заказнік рэспубліканскага значэння "Рычы" быў створаны ў Браслаўскім раёне Віцебскай вобласці ў 1979 г. Мэтай заснавання стала зберажэнне аднайменнага возера і прылеглых да яго прыродных комплексаў.

Плошча ахоўнай тэрыторыі, размешчанай у заходняй частцы Браслаўскага ледавіковага ўзвышша, складае 1,3 тыс. га. Часткова яна забалочана і пакрыта невялікімі ўчасткамі альхова-яловых лясоў, хмызнякамі, лугавой расліннасцю. Маляўнічае возера, з берагамі, зарослымі чаротам, трыснягом і аерам, з’яўляецца другім па глыбіні ў Беларусі (51 м). У яго іхтыяфаўне больш за 20 відаў рыб: рапушка, сняток, шчупак, лешч, судак, мянтуз, лінь, сом, акунь і інш. Водзяцца рэлікты ледавіковага перыяду (лімнакалянус, понтапарэя, бакаплаў Паласа), занесеныя ў Чырвоную кнігу Рэспублікі Беларусь. У флоры больш за 500 відаў сасудзістых раслін, з якіх палушнік азёрны, тайнік яйцападобны, пуханос альпійскі і бяроза прысадзістая з’яўляюцца ахоўнымі. Сустракаюцца рэдкія для Беларусі прадстаўнікі наземных пазваночных – звычайная пустальга, арлан-белахвост, змеяед і скапа.

Заказнік з’яўляецца аб’ектам экалагічнага турызму. Ён размешчаны ў прыгранічнай паласе, таму для яго наведвання патрабуецца дадатковы дазвол. Для турыстаў маюцца базы для пражывання, абсталяваныя месцы для адпачынку і аглядныя пляцоўкі, распрацаваны пешыя, веласіпедныя і водныя маршруты. На тэрыторыі заказніка знаходзяцца два буйныя ледавіковыя валуны “Вялікі камень анісімавіцкі” і “Чортаў камень рычаўскі”, якія маюць статус помнікаў прыроды рэспубліканскага значэння. У вызначаныя тэрміны дазволена рыбалка.

Матэрыял падрыхтаваны ў 2023 г.