Гідралагічны заказнік рэспубліканскага значэння “Верхневілейскі” быў створаны ў Докшыцкім раёне Віцебскай вобласці ў 1996 г. Мэтай заснавання стала стабілізацыя гідралагічнага рэжыму р. Вілія з прытокамі і аднаўленне ўнікальных прыродна-раслінных балотных комплексаў.

Плошча заказніка складае 815,02 га. Яго рэльеф прадстаўляе сабой пераважна водна-ледавіковую раўніну. Па тэрыторыі працякае р. Вілія, вытокі і значная частка поймы якой забалочаны. Асноўнымі лесаўтваральнымі пародамі тут з’яўляюцца хвоя, асіна, елка і бяроза. У падлеску растуць ядлоўцы, рабіна, каліна, ляшчына, ірга каласістая, вярба размарыналістая. Шмат высокапрадукцыйных лугоў з каштоўнымі кармавымі злакамі, бабовымі, лекавымі і дэкаратыўнымі раслінамі. Флора налічвае больш за 300 відаў сасудзістых раслін, з якіх лінея паўночная і арніка горная ўнесены ў Чырвоную кнігу Рэспублікі Беларусь. На тэрыторыі зарэгістравана прысутнасць дзікоў, ласёў, ваўкоў, ліс, баброў і інш.

Заказнік з'яўляецца аб'ектам экалагічнага турызму. Тут праводзяцца пешыя і водныя экскурсіі, пракладзена некалькі веласіпедных маршрутаў. Для наведвальнікаў абсталяваны экалагічная сцежка і зоны адпачынку. У вызначаныя тэрміны дазволена паляванне.

Матэрыял падрыхтаваны ў 2023 г.