Заказнік-журавіннік (з 2007 г. – рэспубліканскі біялагічны заказнік) “Амяльнянскі” быў створаны ў Пухавіцкім раёне Мінскай вобласці ў 1979 г. Мэтай заснавання стала зберажэнне ў прыродным стане месцаў росту журавін.

Ахоўная тэрыторыя плошчай больш за 2 тыс. га размяшчаецца на вярховым балоце Парэцкі Мох. У межах знаходзіцца таксама возера Цёмнае, працякае р. Пціч. У раслінным покрыве пераважаюць хваёва-сфагнавыя і хваёва-багуна-сфагнавыя фітацэнозы. Па ўскраінах балота і на мінеральных астраўках распаўсюджаны лясы з хвоі, елкі, бярозы і асіны. Флора налічвае 462 віды сасудзістых раслін, з якіх баранец звычайны, касач сібірскі, венерын чаравічак сапраўдны ўнесены ў Чырвоную кнігу Рэспублікі Беларусь. Па ўсім балоце шмат журавін і чарніц. У межах заказніка пражываюць 67 відаў наземных пазваночных. Сустракаюцца рэдкія для Беларусі барсук і беласпінны дзяцел, у прыбярэжнай зоне р. Пціч маюцца бабровыя пасяленні.

Заказнік з’яўляецца аб’ектам экалагічнага турызму. Для наведвальнікаў тут абсталяваны месцы для адпачынку, пракладзена экалагічная сцежка. У вызначаныя тэрміны дазволена паляванне, рыбалка, збор ягад і грыбоў.

Матэрыял падрыхтаваны ў 2023 г.