Заказнік-журавіннік (з 2007 г. – біялагічны заказнік рэспубліканскага значэння) “Копыш” быў створаны ў Пухавіцкім раёне Мінскай вобласці ў 1979 г. Мэтай заснавання стала зберажэнне ў прыродным стане месцаў росту журавін.

Ахоўная тэрыторыя плошчай больш за 1 тыс. га размяшчаецца на аднайменным балоце пераважна вярховага, месцамі нізіннага і пераходнага тыпаў. Амаль уся паверхня занята мяшаным лесам з хвоі, елкі, бярозы і асіны. У флоры зарэгістраваны 451 від сасудзістых раслін, з якіх аўсяніца высокая ўнесена ў Чырвоную кнігу Рэспублікі Беларусь. У лесе маюцца вялікія запасы журавін. Тут пражываюць 66 відаў наземных пазваночных, у тым ліку рэдкія для Беларусі барсук, шэры журавель і беласпінны дзяцел. У вызначаныя тэрміны ў заказніку дазволена паляванне, рыбалка, збор ягад і грыбоў.

Матэрыял падрыхтаваны ў 2023 г.